【玩物評測】原來呢隻先係正! LEGO Monkie Kid 悟空小俠 機甲系列 開箱

上星期同大家開左 LEGO 全新系列Monkie Kid 悟空小俠 80013 Monkie Kid’s Team Secret HQ 萬能海上基地,之後就聽到好多玩家們、朋友們期待我地開埋成個系列最多人談論、最吸睛嘅 80012 Monkey King Warrior Mech 齊天大聖黃金機甲,咁我又手多多入埋 80010 Demon Bull King 牛魔王烈火機甲,諗住純粹湊埋試下可唔可以擺到好似兩隻機甲對打嘅場景。我真慶幸自己有呢個多手,唔係的話真係誤判優劣!事不而遲,即刻同大家先開相對少談論嘅 80010 Demon Bull King 牛魔王烈火機甲 先!

 

80010 Demon Bull King 牛魔王烈火機甲 – 1051 件 – USD $89.99 (香港售價 $729)

9 大包組件,又有官方燈件,又有唯一得佢有嘅鐵扇公主 (Princess Iron Fan)淨係呢兩點,都有咁上下吸引力架!

貼紙部份又見到簡體字…..幸好唔係重要部份,貼唔貼就玩家自決啦!而右邊就係鐵扇公主把扇,一陣再同大家睇睇把芭蕉扇嘅效果

製作書得一本,製作過程大家覺唔覺有啲似機械人模型嘅製作程序?

Minifigures 犍方面就只係三隻,齊小天 (Monkie Kid)朱大廚 (Pigsy)鐵扇公主 (Princess Iron Fan)齊小天朱大廚都之前喺 80013 同大家睇過,今次我地主力睇鐵扇公主 (Princess Iron Fan)

除左朱大廚,其他兩隻都有雙表情。而齊小天嘅表情就同 80013有所分別

鐵扇公主 (Princess Iron Fan)個 Minifigure 髮型就全新特製,如果要自組中、日式古裝角色嘅朋友真係要收隻嚟自用啦

拎埋把芭蕉扇,其實都幾霸氣

唯一唔明白官方點解咁細件嘅特效膠片,都要印大大個商標落去,你都咪話唔影響觀感,礙眼得可怕

終於到 80010 Demon Bull King 嘅主體啦!

腳掌有貼地關節設計,呢一點真係好值得一讚

腳底仲用到軟膠去令機甲站立時企得更穩定

撳實背後呢個掣,大家就可以見到佢核心發光嘅狀態

可惜 80010 真係得正面、側面望得下,背後唔講仲以為件野未砌好……


睇完 80010 Demon Bull King 牛魔王烈火機甲隻大牛牛,我地睇埋 80012 Monkey King Warrior Mech 齊天大聖黃金機甲 之後先再做個整體總結。

80012 Monkey King Warrior Mech 齊天大聖黃金機甲 – 1629 件 – USD $149.99 (香港售價 $1159)

12 大包,加埋大大張特效膠片同埋機甲嘅長袍

80012 份貼紙就真係出事啦,半繁半簡嘅問題非常嚴重,幸而悟空機甲主體上嘅貼紙係一隻字都冇,算係不幸中之大幸……

呢份特效膠片相比 80010,商標部份冇咁明顯

本身見到件長袍喺包裝袋入面摺完再摺,估唔到攤開出嚟啲摺痕完全唔覺!

製作說明書分兩本,第二本先係悟空機甲主體

Minifigures 總共 6 隻,兩隻牛雜兵同齊小天都睇過,我地主力睇其他 3 隻

兩個路人加埋孫悟空(Monkey King)

兩個路人 An(女)Jia(男)好彩都仲有雙表情,個「驚青樣」都幾可取嘅

孫悟空(Monkey King)又係有雙表情

同第 19 代 Minifigure 中嘅孫悟空相比,造型上兩者當然明顯不同,而特別一提 80012孫悟空係冇金剛箍架!

猴尾呢件組件就同 19 代嘅一樣,都有印條金邊去令佢感覺更華麗

80012 除左悟空機甲呢個重點之外,仲有呢幾個小場景同隻細牛機甲

細牛機甲真係可以話係「小而強大」,件數少、造型簡單美觀、活動性高、結構穩固

所有關節都係靠 ball joint 件搞掂

拎返 80013 Monkie Kid’s Team Secret HQ 萬能海上基地 入面齊小天隻機甲一拼,絕對唔會輸蝕!

我估呢個應該係花果山吧?

呢舊雲,唔洗介紹啦掛?!

連埋支架嘅呢個設計,拎上手搖下搖下都幾過癮

呢棟建築場景,外觀有啲似我地深水埗一帶啲唐樓嘅外觀,不過大部份簡體字貼紙都係於呢個場景出現,我自己就對此觀感就大打節扣啦

得半邊,大家都預左啦

預留左部件比玩家同其他 LEGO Monkie Kid 悟空小俠 嘅產品場景

麵檔啲小配件設計非常不俗

爐頭嗰張扮油漬嘅貼紙就真係用得妙

第二層就係朱大廚 (Pigsy)睡房

屋頂呢部份係咪同 80013 貨櫃船頂好似呢?

終於進入 80012 嘅重點 – 悟空機甲

不論係砌開 MOC 嘅製作者定係普通玩家,大家對 80012 Monkey King Warrior Mech 齊天大聖黃金機甲嘅著眼點,不約而同都係呢十多款嘅「黃金件」。正常嘅,歌都有得唱啦「金光閃閃多美麗~金光閃閃叫人迷~」嘛!

用 Minifigure 嘅視覺又真係幾震撼

仲有駕駛艙,設計到勁有X達嘅感覺!

放埋 Minifigure 落去就靚晒

胸口個窿仲可以望到駕駛員位置,所以如果想自組機甲又唔知點開始的話,80012 呢個駕駛艙設計真係好值得參考

背後呢塊長袍真係幫到手,唔會好似 80010 大牛牛咁好似半完成嘅感覺

除左件袍之後你睇到個分別同件袍嘅實用價值啦!

機甲嘅頭部面相無乜挑剔

膊頭嘅關節設計同用件都同 80010 接近一樣,不過佢悟空機甲喺佢膊頭嘅裝飾就成為佢手臂活動性大減嘅致命傷

反而前臂、手腕、手指嘅活動能力奇高,可惜膊頭嘅問題令呢幾組關節嘅高活動性無得發揮

腰部就全靠特效膠片去成為主要元素

大脾向前嘅活動幅度又係非常唔錯

反之向後嘅活動幅度就只係得咁多,不過都未係最嚴重問題

腳掌部份就只係用一組Technic 嘅關節件 (Rotation Joint Ball)去支撐同活動,結果因為支撐點太弱,喺擺出不同姿勢嘅時候都會有種就跌就跌嘅感覺。

腳底都有軟膠組件去增加穩定性

唔靠支金剛棒支撐的話,就只能擺啲好四平八穩嘅 Pose

總結

 

先講兩隻機甲嘅關節以 Technic 系統同齒輪組去活動,的確可以確保到佢嘅關節單一部份嘅穩定性,但係所需嘅空間多左,而且關節活動應該係多角度,依家兩隻機甲嘅設計係先做關節嘅前後活動部份,再去做上下活動部份。結果因組件空間不足,令關節上下活動幅度受阻,可以擺出嘅姿勢就受到極大限制。

 

 

80010 Demon Bull King 牛魔王烈火機甲設計比大家都係一種力量型感覺,四平八穩、活動性唔高都仲可以因外觀設計影響而接受。但 80012 Monkey King Warrior Mech 齊天大聖黃金機甲 要擺個四平八穩嘅姿勢都唔容易,對小朋友嚟講可以話非常高難度,企都企唔穩嘅時候,隻悟空機甲最終可能變成散落滿地嘅散件。

 

 

然而我好支持如 80010 Demon Bull King 牛魔王烈火機甲 一樣,只係得機甲主體同 Minifigures,冇其他額外嘅小場景或者佈置,令價格有下調嘅空間。始終一件玩具售價過千的話,會令唔少購買者有所卻步。

 

 

最後,今次 LEGO Monkie Kid 悟空小俠兩款機甲,雖然最終成品唔算太出色,但係用上一啲幾新穎嘅製作方式去設計,比起舊有嘅 LEGO 產品機甲有種新鮮感。特別係80012 Monkey King Warrior Mech 齊天大聖黃金機甲用左特效膠片同布料,去遮蓋設計上不足嘅地方,的確係個非常聰明嘅做法。

但如果只能二揀一的話,我一定會選擇 80010 Demon Bull King 牛魔王烈火機甲,以官方商品嚟講佢算 CP 值非常高。設計、結構、用件都係帶住唔少驚喜。如果你係買比小朋友玩的話,結實嘅組合結構就算跌跌撞撞都唔會搞到成件散晒。
80012 Monkey King Warrior Mech 齊天大聖黃金機甲 方面反而適合成年玩家,尤其對 MOC 有興趣嘅人士。佢嘅機甲設定好適合想砌日系機械人嘅玩家參考,大量鮮紅色、金色組件又可以比 LEGO Hulkbuster 做大改裝。

 

80010 Demon Bull King 牛魔王烈火機甲、80012 Monkey King Warrior Mech 齊天大聖黃金機甲

  • 發售地點:LEGO Certified Store
  • 地址:
    • – Langham Place L12 Shop 01B
    • – Times Square Shop 902-3C
    • – New Town Plaza Shop 416
    • – Cityplaza Shop 012
    • – Tuen Mun Town Plaza Shop 2217

阿九

阿九 打機 - 識少少;玩具 - 識少少;睇戲 - 識少少;動漫 - 識少少..... 買膠、派膠、分享膠!Only The Best Is Good Enough! Lego Enthusiast https://goo.gl/HRnxDW

追蹤

更多文章