【遊戲介紹】Team 17 全新經營爆趣遊戲《Epic Chef》自耕有機農場仲要做廚神

 

曾開發《Overcooked》以及《Moving Out》等爆趣遊戲系列嘅 Team 17,即將與獨立工作室 Infinigon Games 合作推出新遊戲《Epic Chef》,正式推出日期未定,暫定對應平台為 Steam。

 

 

《Epic Chef》裡面,玩家飾演一個想成為廚神嘅青年 Zest,要成為廚神唔單止要有高超嘅烹調技術,食材質素都非常重要;所以,玩家於遊戲入面,第一步嘅難題係《牧場物語》——你需要種出品質優良嘅蔬菜水果,精通農業;下一步要做埋畜牧大王,養飼豬牛雞等動物(好似連獨角獸都可以養……);同時亦可以去釣魚等等。

 

 

最痴線嘅係,玩家仲需要收集唔同原料,自己去開發出各種廚具,從而提昇自己嘅烹飪技術。

隨住玩家技術及能力提昇,更多類型嘅食譜亦會得以解鎖。因應玩家投放嘅食材,食譜亦有可能會產生變化。遊戲最終目標要成為「食神」,所以玩家亦需要與城鎮裡面其他 NPC 進行廚藝大賽。

 

 

《Epic Chef》裡面嘅經營要素固然吸引,各種菜單亦做得非常仔細,相信係一隻非常耐玩同有趣嘅遊戲。假如你都對呢類型遊戲有興趣,不妨將遊戲擺入你嘅 Game List。

 

 

 

神婆

神婆 真身為非典型占卜師,唔神秘,無形象,為咗兩隻貓嘅生活努力奮鬥。日系遊戲及 JRPG 專攻,重度聲優控。首本個人塔羅散文今年書展上架:shorturl.at/iDMWY

追蹤

Facebook 更多文章