【遊戲感想】戰鬥畫面音效細節一流製作《The Last Of Us Part 2》惟劇情遺恨各終是否能為玩家接受?

 

PS4 年度大作《The Last Of Us Part 2》會於 2020 年 6 月 19 日正式上架,VJGamer 作為香港遊戲媒體一員,榮幸地得到 SIE 邀請,優先獲得遊戲作感想之用。不過,基於各種媒體守則,也考慮到正在閱讀本文的你尚未進行遊戲,所以本文有劇透部份將特別注明,希望大家安心服用(早期評測文章按此

相信唔少朋友都會認同,《The Last Of Us》係一隻近乎完美嘅出色作品。因此,當《The Last Of Us Part 2》宣佈開發時,我身邊唔少玩家朋友,都抱住尊祟而期待嘅心情,默默地等待著遊戲的來臨。

是的,我也同樣地對喬爾及艾莉嘅新故事、新旅程、新關係感到好奇。

 

 

官方後來說,《Part 2》的主角是艾莉,喬爾的戲份很少;再後來,Naughty Dog 鬧員工糾紛,有個前員工跑出來在網上 100%劇透玩家,聽說大家看完都是一面倒的批評……我也不去看,不去搜尋,我乖乖地等遊戲來到我的手上。

然後,我進入遊戲後不久,就急忙拿來滿滿一盒紙巾。看著一幕又一幕令我意想不到、卻又痛心非常的劇情,我喊到收唔到聲。

 

 

我開始明白為何官方說「玩家未必會喜歡這個遊戲」(原文 from Neil Druckmann@Naughty Dog:”Some are not going to like this game, and not like where it goes, and not like what it says or the fate of characters that they love.)

在撰寫本文的時候,我已經爆機兩星期左右了,暫時未有勇氣去開二周目,也許我也不會有勇氣再次面對這個故事。

 

 

假如你問我《The Last Of Us Part 2》係咪一隻值得玩嘅好遊戲,我會老實答你:佢係一隻好用心製作嘅遊戲;但我唔肯定,佢會唔會係一隻令到玩家喜愛嘅遊戲。

我只能說,《The Last Of Us Part 2》係一隻充滿了「恨」的遊戲。

以下,先容我講左系統方面嘅感想先。

 

 

【探索】

《The Last Of Us Part 2》是一隻就算只玩主線,已經非常有份量的遊戲,它沒有刻意的支線,也沒有新增什麼升級系統。同上集一樣,玩家沿路收集素材去過強化自己嘅槍械,以及拾取近戰時的招式書去解鎖新技能。

假如玩家有心機,唔係淨係跟主線一味向前衝、而係多花一啲時間喺沿路經過嘅城鎮及房屋多加搜索,話唔定會有意外收穫,亦可以同時實踐埋遊戲中各種收集要素。

 

 

例如艾莉所住的小屋有部 PS3,呢一點好有趣,因為遊戲第一集推出時為 PS3 年代,而之後世界就毀滅了,所以喺佢地嘅世界入面其實無可能出現到 PS4(笑)呢個位置既有趣味亦非常用心。

 

 

【戰鬥】

遊戲使用槍械嘅手感、回彈力同埋射擊感表現良好;難度初始亦已非常足夠,除左上一集常見嘅蘑菇人,今集常見嘅反而係同為人類嘅敵人。至於受到病毒感染而出現嘅敵人多咗一種,更為核突,亦更為厚血;由於今集頗多室內困戰,所以每當進入戰區時真係要打醒十二分精神,反應慢啲都會比人爆頭咬頸。

 

 

由於早前初期評測已有就戰鬥方面詳述,此處就不再重覆太多。(早期評測文章按此

 

【畫面材質】

必須大力稱讚嘅係工作室對於遊戲細節嘅用心,同時表演「美麗」與「殘酷」嘅主要場景自然不在話下,連玩家只係路過嘅廢屋,於陳設上面都有所不同。

 

 

同時,遊戲中天氣會有陰晴暴雨變化,主角入水後上岸、或是淋雨後吹乾,都會見到明顯「濕潤漸變乾燥」嘅微小變化;又或者係雨天場景,艾莉會戴上帽子;進入室內會自動脫下等等,呢啲細節並唔係必須,只係會令到遊戲更加自然及真實。

 

 

【音效】

音效絕讚。無論係敵方嘅怪叫(?),抑或我方受傷嘅咆哮,甚至風聲雨聲、於寂靜空間裡面微妙嘅空間流動聲音等等,全部都做得非常精細,於營造氣氛上面絕對係一絕。

 

 

不過,音聲方面嘅重點,絕對係遊戲一開始,喬爾為艾莉唱嘅一首歌。

由呢首曲響起開始,拎定紙巾吧,仔細閱讀歌詞,因為心痛的部份馬上就要開始了。

 

 

【劇本】

終於黎到劇本部份,以下有輕微劇透,不過玩家如果唔想受到其他人睇法影響,請睇到呢度就止步

作為一個《The Last Of Us》嘅玩家黎講,《Part 2》嘅故事,每一部份都令我感到不解。故事派便當派得很爽快,假如你本身曾經有至親離世、有情緒疾病,老實講,請你做好心理準備先好去玩呢隻遊戲。

 

回憶部份,到底想玩家流幾多次眼淚?

 

官方話想令玩家喺遊戲裡面感受到「恨」,就呢一點黎講,Naughty Dog 係好成功的。我明白《The Last Of Us》 本身就唔係開心 Happy End 嘅遊戲,但係有無必要咁樣多方面地去令玩家感到難受同埋痛苦呢?

例如喬爾嘅遭遇,佢與艾莉之間永遠不可解嘅遺憾……雖然呢度係促成左艾莉踏上復仇之旅嘅原因,但係,我並唔認同喬爾嘅遭遇要咁樣發生

 

 

另一方面,今集遊戲其實係採用雙視點進行,前半部份係艾莉,後半部份,玩家要操控 Abby,一個相信唔會有玩家會鍾意佢嘅角色。於呢個弱肉強食嘅世界,Abby 因為非常自私嘅理由,開始復仇。呢一點已經令到我好厭惡。

 

 

最差勁嘅係,Naughty Dog 用左一整集時間黎建立玩家與喬爾及艾莉嘅感情,黎到《The Last of Us Part 2》,Abby 不斷傷害艾莉之餘,你仲要不斷用各種劇情去為 Abby 呢個角色洗白、夾硬令玩家要理解佢嘅行為同心理、強逼玩家要接受「幫 Abby 洗白」嘅劇情……

 

我唔想知佢有咩痛苦呀……

 

就等於市面上有人以正義為名,貫徹私慾,但係轉過頭同你講「佢地都有屋企人架,佢地日曬雨淋都好慘架,佢地有苦衷架」咁樣,我真係非常好奇,到底有幾多玩家會接受「洗白」呢種行為呢?

偏偏操控 Abby 嘅時間,佔咗遊戲近乎一半篇幅!

 

我對 Abby 真係一啲興趣都無,點解半集都逼人用佢!!

 

Naughty Dog 話玩家可能會討厭呢隻遊戲,咁樣嘅話,是的,你成功了。《The Last of Us Part 2》獲得我唔少眼淚。當然,能夠如此深入地牽動玩家嘅情緒,呢一點亦都證明佢地好成功。只係,呢種方式,太過殘酷,而且係難以理解嘅殘酷。

 

 

至於結局安排,亦係非常耐人尋味嘅地方。假如我為了復仇而上路,最後換黎呢個結果,到底我喺呢一集遊戲裡面嘅犧牲,係為左乜野呢?個人認為結局部份應該增加開放式選項,比玩家選擇要唔要執行「最終決定」,而唔係逼玩家只能夠作出「呢一種選擇」。

 

 

所以,我唔識為呢隻遊戲評分。除咗劇本之外,所有野都可以拎不過不失嘅分數,至於最重要嘅劇本……fail。我痛恨呢個劇本。

各位睇到呢度嘅網友,唔知道你對呢隻遊戲又有乜野睇法。我都好想知道,會唔會有玩家同我係抱持完全相反嘅觀感。好歡迎你喺爆機之後,回到我地呢篇文章下面留言分享,又或者係另外撰文同我地及其他玩家交流!

《The Last Of Us Part Two》於 2020 年 6 月 18 日上架,為一隻PS4 獨佔遊戲。

 

神婆

遊戲雜食向,FPS 苦手,全種類 RPG 專攻,重度聲優控。使用機種:Xbox Series X|PS5|Nintendo Switch|Steam Deck。

追蹤

Facebook 更多文章