【讀者投稿】《The Last Of Us Part 2》到底工作室有幾自 High 先寫得出咁嘅劇本?

 

第一次投稿,多謝 VJGamer 編輯部肯登,文筆唔好,同埋因為玩完《The Last Of Us Part 2》太嬲,希望下面既內容唔會太 1999。(編按:以下內容有大量劇透)

作為一個毒撚,真係唔習慣係公開平台講咁多,但係《The Last Of Us Part 2》有幾糞,相信唔駛我多講,大家呢排都係網上面見到有幾炎上。我有睇到好多香港同台灣媒體寫《The Last Of Us Part 2》既 Review,外國下下比滿分果 D 真係埋沒良心,到底收左幾多掩口費呀?

我好認同呢個平台既小編寫嗰篇裡面話(編按:原文連結),大佬牙,上一集你用左成集篇幅去強調喬爾+艾莉到底點樣建立深厚感情,Joel 仲係主角黎,佢同艾莉仲有心結未解,然後今集你一開波,你就拎阿 Joel 個頭黎開波!我屋企有人係打 Golf 架,你要我以後點樣面對屋企 D 哥爾夫球棍呀?!

 

所有喬爾出場既片,男人老狗都睇到流馬尿

 

末世黎架,弱肉強食既世界黎架,唔係你殺我就我殺你架啦!!你入到 Game 都係見人就殺架啦,唔通仲同你坐低傾下,sorry 係唔係敵人?係既我先殺你,咁樣咩!你話艾比死左老竇好嬲要報仇,你不如又諗下,人地 Joel 都係一槍殺佢,你呢個生得樣衰又大隻既核突婆,洗唔洗咁樣虐死 Joel 呀?

再講,你要一命填一命,你因為嬲你老相好所以自己走出雪地時,唔係湯米同喬爾救左你,你晨早比人咬死感染埋死左添啦!報仇喎,笑話黎,人地救你唔係救呀?

 

無鬼用,咬鬼死佢咪唔洗煩

 

《The Last Of Us Part 2》個劇本由頭到尾都痴哂線,居然仲要玩家用艾比玩半隻 Game,呢隻艾比,人型狒狒咁樣衰都算,性格仲要自私到核爆,上面報仇果段已經乞人憎,你頑皮狗仲想幫佢洗白呀?

講到佢無左老竇好慘呀?你老竇話女主角艾莉死左就有疫苗,講到好偉大咁,但係如果要你殺左自己個女艾比先有疫苗,你係咪又會殺得落手? 喬爾既行動係出於人性,你地既行動完全就係自私仆 x 到極端,又要拎光環又要做雞,咁即係點?

艾比條故事線仲要無啦啦加插埋個 ex 既情節入去,講到艾比因為心理陰影而唔敢接受個 ex,結果個 ex 去左溝梅兒,仲有埋 BB;點知轉個頭,艾比爬完山行完屎渠,搵到個玩失蹤既 Ex 之後,居然係即刻除衫玩乾柴烈火?無人想知呀!無人想睇呀!成班人都痴痴地線,我真係好憎個劇本不斷搵野自圓其說,為 D 唔 make sense 既故事去搵理由!!

 

簡直係攞黎講

 

艾莉黎到今集故事又係唔知做乜,ok,我當你睇住 Joel 比人虐死,仇恨衝昏頭腦,所以一味想報仇;但係同 Dina 條感情線又係做乜野呢?老實講我都好唔鍾意 Dina 呢個角色,首先我覺得女同性戀呢個設定係多鬼餘;二來,中途 Dina 仲發現有左傑西 bb,仲要已經幾個月!

呢 d 乜野時間性黎?即係 Dina 你同佢做完愛,無做安全措施,下一秒即刻分手,再去溝艾莉,係咪咁話?

 

我真係好唔鍾意 Dina,當然無得當艾比相比

 

唔怪得之外國啲女權同 LGBT 咁嬲架 wor,你講到 Lesbian 好似智障叫春咁 wor?不過 sorry Dina 個角色都係乞人憎架喇,懶有理性咁樣,一開始懶有義氣跟住艾莉「我撐你」,轉個頭你有左 bb 都算,劇情後半部分時,艾莉明顯就放唔低喬爾嘅死,但係 Dina 講到尾都只係想當「咩事都無發生過,安於現狀,做個聽話的乖寶寶」,艾莉唔肯留低同你逃避現實,呢條女居然帶埋個細路走佬!你到底有無真係用心理解過艾莉既痛苦架?!

 

 

結局呢一段又係痴線地唔合理。艾莉幾經辛苦終於搵到艾比啦,艾比比人呃左,同個亞洲人細路好慘咁比人晾喺海灘乾曬。首先,d npc 明明話佢地已經吊左一個月,點解仲可以未死?佢肥獅大隻啫,有無咁命硬呀?Sor9!真係有!

然後艾莉為左殺艾比,一路上咁辛苦,而家見到佢就黎死啦,你點解要救佢?點解?點解!!!!即係其實你可以唔救佢,等佢自然死亡,咁就唔駛整污糟自己對手;亦可以救佢落黎之後再打鑊甘,殺左亞洲細路再殺佢。當然你可以唔殺佢,咁咪「整選項」囉,開放式選擇囉,比玩家自己揀殺定唔殺艾比囉(最好做埋統計,睇下想唔殺佢既玩家有幾多)<— 敢寫包單 99% 都係殺死佢

 

 

無論係邊種結局,我絕對唔認同艾莉咁辛苦,係放生艾比囉!咁你一路以黎為左乜野?你犧牲左傑西,犧牲左 Dina 呢個扮幸福嘅家庭,犧牲埋隻手指,搞到以後彈唔到 Joel 留比你既結他,做・乜・L・野?!!!!

《The Last Of Us Part 2》個故事左膠大愛包容到癲,同埋真係好政治正確呀,LGBT 擺入去!d 組織高層就係黑人黎既!亞洲人就係迷信同埋死不足昔!Dina 仲要係印度人定唔知咩人,話你知呢個世界唔一定要白人先至多戲份!

 

傑西好慘,死完之後無人提

 

喂既然都做到咁膠,不如你話艾莉艾比坐低飲茶食包,睇聖經,化解仇恨啦,咁樣反而 cult 得黎有 d 睇頭呀!!!遊戲發展到咁,頑皮狗個 Neil 仲話,唔鍾意就唔好玩 wor!你到底有幾反社會呀?

同埋呢隻垃圾 Game 真係去到最後都唔會令你失望。最後,艾莉做完左膠,返到屋企,唔見 Dina 同個仔,第一件事居然唔係搵下佢地去左邊,或者因為見唔到佢地而感到崩潰,而係斯斯然去拎起支他,呢個發展都真係幾唔人性化………

 

 

我唔知媒體承受 sony 或者頑皮狗幾多壓力啦,老老實實由我見到果張外媒一致比 10/10 呢隻垃圾 Game 開始,我已經知道講真話真係唔易!連呢個平台小編寫果篇,雖然係鬧,但鬧得好厚道,可能都係媒體工作既壓力啦(編按:呢啲我地唔講啦 T_T)我無意冒犯,不過我睇完覺得唔夠暢快,所以先會寫呢篇感想(所以你地 if 真係登既,多謝你地!)

係呀,隻 Game d 畫面系統整得好正路,但係劇本糞呢,死罪黎架 wor!如果香港有得投票 The Game Awards 2020,我絕對係揀呢隻《The Last Of Us Part 2》係「今年最爛之作」,不作他選!

 

 

VJGamer 歡迎讀者投稿 – 如蒙投稿,請將文稿、筆名、作者簡介及聯絡電話,電郵至 [email protected]

 

茶水間一郎

我只係一個鍾意睇動畫打機嘅 IT9,我無用我廢中

追蹤

更多文章