【遊戲新聞】《Metal Slug》全新作品正式公開 再次出發對抗德軍外星人

由 SNK 推出嘅超經典橫向動作射擊遊戲《Metal Slug》系列,一直以黎深受歡迎,但係自從 2009 年推出《Metal Slug XX》後,就再無正式續作推出。根據韓國媒體 Inven 報導,SNK 執行董事 Se-Hwan Jeon 表示現時有二款《Metal Slug》製作中,其中一款手遊《Metal Slug Code: J》日前仲正式公開首條預告片。

 

 

《Metal Slug Code: J》由 TiMi Studios開發(又係騰訊……),屬橫向卷軸動作射擊遊戲。今集畫風有所轉變,角色、載具、敵人等等改為使用 3D 模組,不過個人就比較鍾意舊版美術。喺影片入面見到遊戲出現大量舊作關卡,例如初代第一關 Absolute Thick Forest、初代第二關轟炸機 Boss、三代第一關蟹坦克等等。

 

角色轉用 3D 模組,我都係而家先知 Marco 係行有型路線

 

登場角色暫時見到有 Marco、Tarma、Eli、Fio 四人組,Clark 同 Ralf 未知會唔會以特別角色登場,另外暫時已知有「冰凍槍」一種新武器。同原版不同,我地見到角色頭上有四格生命值,意味住唔再係中一下死(小兵都變到唔係一下死),而 Boss 戰亦會顯示剩餘生命值。淨係呢二點已經覺得好《Metal Slug》,不過都要等正式推出先知係咪落親手機嘅都係 _ _。(一隻咁講操作技巧嘅遊戲,落手機會淨返幾成?)

 

留意上方有 Boss 血量

敵方小兵都變為扣血制,唔係一槍死

 

《Metal Slug Code: J》現正開發中,預計今年正式推出,對應平台為 iOS 及 Android。另外除咗《Metal Slug Code: J》,仲有另一隻《Metal Slug》製作中,但係對應平台係家用版主機,而且同樣係 2020 年內推出,個人黎講對呢隻比較期待。

 

五木

動漫電玩宅,極愛金田一系列,擅長動作及策略遊戲

追蹤

更多文章