音樂節奏遊戲同動作遊戲大家唔會陌生，如果將二樣野溝埋又會點呢？由日本一開發嘅《MAD RAT DEAD》，就嘗試將二者結合，而且感覺仲非常「得」，似乎會成為年尾嘅「黑馬」作品，極之值得留意！

《MAD RAT DEAD》由曾製作驚悚遊戲《夜迴》系列總監「溝上 侑」所創作，玩家需配合音樂節奏按下按鈕，令角色進行動作前進，另外喺影片入面見到角色係會「向後行」（仲要打 Boss 添），估計要配合埋方向鍵操控，即係要同時兼顧動作及音樂節奏二方面。

就咁睇似乎好難，但係留意下方出現嘅譜面其實相對簡單，而且動作部份亦唔算太難。加上遊戲會利用控制器「震動」功能去提示玩家音樂節奏，相信音樂果 Part 唔會太難。順帶一提，本作邀請到「a_hisa」、「Dyes Iwasaki」、「大山 曜」、「かめりあ」、「崎田浩一」、「川越好博」、「高須和也」等七位音樂人製作音樂，質素有一定保證（話晒有經常出現於其他音樂遊戲嘅「外援」音樂人）。

遊戲故事就比較簡單，故事主角「瘋狂小白鼠」其實係一隻實驗用鼠，可憐地於籠中終結一生。老鼠之神見佢咁可憐，於是賜予佢「最後一天的生命」，然後佢就踏上向人類復仇之路。但由於本作使用色彩鮮艷動畫風格，基本上完全 Feel 唔到恐怖味。

《MAD RAT DEAD》預計於 10 月 29 日推出，對應平台為 PS4 / Nintendo Switch，並支援繁體中文。