【遊戲介紹】法國大革命變成機械兵暴走武鬥《Steelrising》面向次世代機種的動作歷險

 

講起以法國大革命為題材嘅遊戲,相信唔少玩家都會第一時間諗起 Ubisoft 於 2014 年推出嘅《刺客教條:大革命(Assassin’s Creed Unity)》。今次同大家介紹呢隻《Steelrising》同樣地以法國大革命作為故事背景,只係劇本就黎個大逆轉,路易十六用黎震壓革命嘅居然係超先進嘅機械兵,聽到呢度又會唔會引起你少少興趣?

 

 

《Steelrising》由去年被 Nacon 收購嘅法國工作室 Spiders 全力開發,Spiders 對上一隻遊戲為 2019 年推出於各家用機平台嘅《Greedfall》,雖然遊戲於操作系統上面有唔少問題導致風評一般,不過可以見到 Spiders 為一家充滿野心亦勇於嘗試嘅工作室。

 

 

遊戲舞台嘅法國,宮廷有使用機械兵嘅習慣。玩家飾演嘅 Aegis 就係擔任瑪麗皇后近身護衛嘅精英機械兵。路易十六荒淫而無能,有暴君之名,民眾掀起革命,路易十六就嘗試以機械兵震壓;而瑪麗皇后希望阻止機械兵屠殺人民,於是吩咐主角去搵出當時開發出機械兵嘅人,希望可以制止機械兵嘅暴力行為。

 

 

遊戲大綱聽落就好超現實,不過舞台上面就好還原,工作室希望將當時嘅法國地標同埋歷史建築都加入遊戲裡面,唔知道製成品會有幾像真?由於遊戲目前尚在開發階段,系統方面嘅資訊就要容後再同大家報導了。遊戲實際推出時間未定,對應平台為 PC 以及次世代機種,相信包括 PS5 以及 XBox Series X。

 

 

 

神婆

神婆 真身為非典型占卜師,唔神秘,無形象,為咗兩隻貓嘅生活努力奮鬥。日系遊戲及 JRPG 專攻,重度聲優控。

追蹤

Facebook 更多文章