【遊戲新聞】Ubisoft 新作大晒冷 四大作品一次睇晒

琴晚 Ubisoft 就做咗場 Ubisoft Forward 線上發表會,會中一次過晒冷,旗下四款大作《超能競地》、 《Far Cry 6》、《看門狗:自由軍團》、《刺客教條:維京紀元》全部都有新消息及上市日期,雖然《Far Cry 6》早前唔小心 Leak 咗,但仍然無損各大作嘅吸引力,為咗方便大家,我地一次過整理晒相關資訊,GO!

 

 

節奏快速大逃殺遊戲 《超能競地》,即日起開放公測

之前已經做過封測嘅《超能競地》(Hyper Scape),係一隻最多支換 100 名玩家對戰嘅快速射擊遊戲,採用第一身視點。遊戲主打快速戰鬥,加入「跳台」系統,令到玩家經常大幅度轉變自身活動路徑,傳統「Camp」位打法變得不利。另外遊戲世界中可以搜刮武器以外仲需要搜刮「駭能」。「駭能」提供了適合各種遊戲玩法進攻及與防守能力,例如埋地雷、索敵、起牆、隱身等等。

 

 

《超能競地》Beta 公開測試將創新地引入 Crowncast Twitch 擴充功能,觀眾可透過觀賞《超能競地》Twitch 直播獲取 Battle Pass 經驗值,以及直播主可以邀請觀眾加入他們的小隊。加上先前推出嘅觀眾事件,允許觀眾對影響所有參戰者嘅遊戲事件進行投票來即時影響對戰,例如開啟低重力,或無限彈藥等等,Beta 公測仲有「加速」事件,用以加快所有參戰者遊戲速度。

 

 

今次 Beta 公開測試,將提供以 3 人小隊模式「小隊奪冠進擊」為基礎,大逃殺主模式嘅 100 人自由對戰版本「單人奪冠進擊」。另外仲會提供兩個新限時模式:「小隊駭能逃走中」同「小隊疾速模式」。此外,除了先前技術測試中提供嘅 9 把武器同 9 種駭能,Beta 公開測試也包含了新駭能「衝擊波」及新武器「鳥身女妖」。

 

 

《超能競地》(Hyper Scape) 即日起於 PC 平台展開公開測試,參與測試嘅玩家仲可以獲得免費 30 階級嘅 Battle Pass。

 

 

《極地戰嚎 6》領導一場游擊革命解放國家

之前唔小心 Leak 咗發售日嘅《Far Cry 6》,都喺琴晚正式公佈,由 Ubisoft 多倫多工作室開發,使用第一身視點。今集遊戲講述熱帶天堂「亞拉」,總統安東.卡斯迪路(Esposito 飾)發誓要恢復國家昔日輝煌,同時培養兒子迪亞哥(Gonzalez 飾)作為接班人。然而天堂是有價的,富國就意味著要征服果班反抗嘅人。而玩家就扮演喺呢個動盪不安嘅島國入面,推翻暴君革命運動中其中一員,並體驗遊擊戰嘅驚險與混亂。(特別係預告片出現大量掉火魔片段,相信香港人格外有親切感)

 

 

遊戲中玩家將扮演男性或女性「丹尼.羅哈斯」,他/她係被捲入革命對抗安東.卡斯迪路嘅亞拉當地人。扮演「丹尼」嘅玩家將成為遊擊戰士,從蒼鬱叢林到亞拉首都艾斯佩蘭薩探索及團結整個島國。為了成功對抗安東政權壓倒性力量,玩家必須運用機智,以及使用各式各樣獨特新武器、新載具及新雇傭猛獸,例如坐輪椅可愛臘腸狗「肉腸」。

 

 

另外今集為更請黎荷李活水平人才黎到強化敘事體驗:有知名演員 Giancarlo Esposito(曾飾演「曼達洛人 The Mandalorian」、「絕命毒師 Breaking Bad」)及 Anthony Gonzalez(「玩轉極樂園 CoCo」)參與演出、影視作曲家 Pedro Bromfman(「毒梟 Narcos」)創作配樂,以及艾美獎得主Patrick Clair(「西部世界 Westworld」、「刑警雙雄 True Detective」)執導開場動畫。

 

典藏版會跟呢支野,有興趣就上官網望下啦

 

《極地戰嚎 6》(Far Cry 6)將於 2021 年 2 月 18 日發售,對應平台為 Xbox Series X、PlayStation 5、Xbox One、PlayStation 4 以及Windows PC(Epic Games Store & Uplay)。

 

《刺客教條:維京紀元》有別於以往作品,攻城掠地起村莊

經歷多過世代嘅《刺客教條(Assasin’s Creed)》系列,最新一集《刺客信條:維京紀元》有大量新轉變,但仍然係動作角色扮演遊戲,使用第三身視點,開放世界。

 

 

《刺客教條:維京紀元》以九世紀英格蘭為背景,玩家將可選擇扮演男性或女性嘅維京領袖「埃沃爾」。喺新公開嘅「真正」實機遊玩影片中,見到新系統「劫掠」。顧名思義,「劫掠」即係率領一整個小隊,去各地村莊「放火打劫」,搜刮各種有用資源。至於搜刮返黎嘅資源,就可以用黎發展自己嘅聚落,然後就可以得到各種更有力嘅武器、工具等等。另外,喺影片最後仲展示「襲擊」系統,亦即係攻城戰,玩大軍攻城,同以往玩暗殺真係非常大分別。

 

 

今集另一新特色,就係玩家可以自由設定雙手用咩武器。你想扮桐人玩雙刀出「星爆氣流斬」又得,雙手揸盾聲稱自己係「盾之勇者」都 ok。根據影片描述,今集敵人類型豐富程度係《刺客教條》系列之最,而且更有各種特性,例如識得群毆、隨手執野攻擊等等,非常有新意。

 

 

《刺客教條:維京紀元》將於 2020 年 11 月 17 日上市,對應平台為 Xbox One、PlayStation 4、Windows PC(Epic Games Store & Ubisoft Store)。

 

《看門狗:自由軍團》抵抗極權,每個人都係「反抗者」

等到頸都長嘅《看門狗:自由軍團》終於有新消息,同時公開極正嘅電影式預告及實機遊玩影片,果然不負 Trailer 大廠之名。

 

《看門狗:自由軍團》屬動作冒險遊戲,採用第三身視點,開放世界。遊戲故事講述係不久嘅將來,倫敦變得面目全非,政府對人民實施高壓統治,人民受到嚴密嘅監控、傭兵團成為最大嘅執法勢力、龐大犯罪集團欺壓弱小群眾等等,而玩家就扮演挺身而出抵抗暴政嘅反抗軍一員。喺之前嘅資料我哋已經知道,今集開放世界中嘅倫敦人都係有自己嘅生活同背景故事,亦都有自己專屬能力,而玩家可以視乎自己喜好去招募任何人加入你嘅軍團。

 

 

當新角色加入反抗軍之後,玩家就可以選擇扮演佢地、升級並解鎖新能力。喺示範影片中,我哋見到可以隨時喺各角色間切換,選擇適合自己嘅攻略方式。有普通嘅地盤佬、潛行專精嘅無人機專家、臥底傭兵團成員、John Wick 一樣嘅職業殺手等等,極之精彩。

 

《看門狗:自由軍團》預計於 2020 年 10 月 29 日上市,對應平台為 Xbox Series X、Xbox One、PS5、PS4、PC(Ubisoft Store/Epic Games Store)及 Google Stadia。另外,只要購買 Xbox One 或 PlayStation 4,即可免費將遊戲升級為 Xbox Series X 或 PlayStation 5 次世代版本。

 

五木

動漫電玩宅,極愛金田一系列,擅長動作及策略遊戲

追蹤

更多文章