由《Fairy Tail 妖精的尾巴》（下稱《妖尾》）宣佈話會遊戲化開始，一直滿心期待，話晒我都係真島浩 Fans。早前我哋有幸得到光榮特庫摩邀請，優先得到《Fairy Tail 妖精的尾巴》完整遊戲試玩，體驗與一眾《妖尾》角色共同冒險嘅樂趣。
人物面相還原度極高
《Fairy Tail 妖精的尾巴》由光榮特庫摩GUST 團隊製作（即係整《鍊金術士》果個間），改編自真島浩同名漫畫，屬於回合制角色扮演遊戲。遊戲由公會龍王阿庫諾洛基亞降臨，發動妖精三大魔法之一「妖精之球」，產生「空白的七年」開始。因為被封印七年，「妖精尾巴」由菲歐烈最強公會變成最弱公會，於是玩家嘅主要任務就係將公會重新升返去第一名。
喺「空白的七年」入面，「妖精尾巴」由菲歐烈最強公會變成最弱公會，內部亦都變得破落
要一步一步咁將公會升返做第一名，但其實過程都頗輕鬆
要升返去第一名，就要透過接取任務黎賺錢同市民信任度，然後再用賺返黎嘅錢去增加及強化公會設施。例如起倉庫後每隔幾回合就有道具拎、強化任務佈告版可以接取更高難度任務等等，系統簡單易明，亦對戰鬥有明顯幫助。（強烈建議起咗圖書室先，加戰鬥後獲得經驗值，升快好多）
LV1 圖書實已經加多 50% 經，升快好多
強化設施後，喺蕾比度就可以合升更高階魔水晶（遊戲中唯一的裝備）
公會要升級仲需要達成相關條件
戰鬥部份，隊伍最多可以五人組成，採用回合制戰鬥。基本指令有攻擊、道具、防禦同魔法，但由於所有人都係魔導士，所以主要都係用魔法攻擊（完全無用過其他指令……）。每種魔法攻擊都會有自己嘅攻擊範圍，最少 1 格最多 5 格，但範圍都係 3 x 3 格內。
顏色越淺代表該格攻擊力越低
有部份技能可以令敵人後退一格，將敵人排列改變成，令範圍可全數命中
招式演出極之華麗，圖為「滅龍奧義 紅蓮爆雷刃」
露西大技「全天星晨」都有，好感動
另外遊戲有屬性相剋系統，剋屬的話會造成大量傷害，並且令敵人產生「Break」狀態強制停止行動一回合。不得不讚嘅係，選擇招式時已列明邊啲技能係「Weak」邊啲係「Resist」，唔洗下下死背。
有清晰顯示，值得一讚
每位角色儲滿氣之後都有「覺醒」型態，不但可強制取消敵人攻擊，仲會自身回血 & 魔以及增加攻擊力。部份角色更有唔同型態選擇，納茲就可以覺醒為「雷炎龍模式」或者‧「龍之力」
《妖尾》入面魔法當然係最重要嘅元素，只要攻擊敵人就會累積「Fairy Gauge」，滿咗之後就可以用超強力嘅「魔法連攜」攻擊，即係隊伍入面每人出 1-2 次招，最後使出「終結技」。隨遊戲劇情推進，仲會學到超強力嘅「超魔法」，甚至連妖精三大魔法之一嘅「妖精光輝」都有得用！
超魔法「妖精光輝」！
到中後期仲有「合體魔法」使用
遊戲整體流程簡單明快，任務委託大多數都係打幾隻怪就搞掂，適合想純粹享受劇情嘅朋友，而且成隻遊戲 Loading 時間超級快，又唔洗練 LV，對於無乜時間嘅香港人黎講真係幾好。唯一可惜係「妖尾」角色唔係全部都有登場，例如「雷神眾」就影都無，不過大部份重要角色都有登場，Fans 都應該收貨。（初代好多戲份！）
角色羈伴任務內容係原創的，彌補無原創主線劇情嘅缺憾
對白明顯有用心度過，見到呢句我都笑咗
又點少得茱比亞嘅 FF
《Fairy Tail 妖精的尾巴》將於 7 月 30 日上市，對應平台為 PS4 / Nintendo Switch / PC Steam。
VJGamer總編，細細個已經蒲機舖，機齡甚深，熱愛電玩文化。