【遊戲新聞】夏季免費更新實裝 《集合啦!動物森友會》放煙花夢遊存檔備份

《集合啦!動物森友會》出咗一段時間,但仍然係唔少朋友每日必玩嘅遊戲,特別係最近連出街食飯都唔比嘅程況下,要同朋友聚下都係要靠《動森》架啦。今日(7 月 30 日)《集合啦!動物森友會》夏季免費更新正式上線,新增「煙火大會」活動、「夢境」系統、以及島嶼存檔備份功能,正阿!

 

 

「煙火大會」活動

喺8月每個星期日晚上,都會舉辦煙火大會,島上嘅居民會喺廣場上集合,一齊睇煙花。如果想創作自己嘅煙花同樣可以,只要將「我的設計」交比廣場上嘅西施惠就得。另外喺狐利嘅攤位,仲可以參加「九尾抽獎活動」獲得獎品!提醒大家,無論北半球或者係南半球,煙火大會同樣會喺 8月入面每個星期日舉辦。

 

 

喺「Nook購物」入面,將新增「七夕」標誌性服裝「織女服/牛郎服」等等,同時會根據節日發售世界各地季節相關物品。

 

 

 

另外,更新後登入會得到「煙火大會牆」,放置喺房間入面,就算你真係毒到無朋友都可以坐喺家中自私睇煙花。

 

 

 

「夢境」系統

想人黎你個島參觀,但係怕人破壞你個島之餘又覺得飛機黎果陣無得郁好煩?「夢境」系統幫到你。只要你喺自己屋企將床瞓覺,就會去到不可思議的空間並遇上夢美。

 

左手邊果位就係夢美……

 

得到夢美嘅幫助,可以喺夢境中參觀其他人嘅島,可以同島上居民交談、隨意喺島上散步,而且喺廣場設置嘅「我的設計」展示櫃,仲可以直接下載該島作者所投稿嘅「我的設計」。不過由於係夢境,所以無論喺島上做咩都唔會影響現實嘅島,所以可以安心做「任何野」。

 

 

另外如果想比世界各地嘅人 Search 到你個島,只要喺夢美度寄存夢境就會得到「夢境門牌號」,然後其他人就可以喺夢境度參觀。特別一提,寄存夢境或是參觀夢境,必需先加入Nintendo Switch Online 服務用得。

 

 

島嶼存檔備份功能

Nintendo Switch 玩家最驚果樣野相信都係壞機,因為《集合啦!動物森友會》存檔資料係跟機的,死機的話個島就會 Bye Bye,超恐怖。今次實裝嘅「復原儲存資料服務」就係針對呢個問題而設。功能實裝後,只要透過網路即可備份《集合啦!動物森友會》儲存資料,萬一唔見咗部機又或者死機,都可以喺備份復原儲存資料。「復原儲存資料服務」將於7月30日開始投入服務。

 

上圖是有關主機維修步驟的例子。根據個別狀況有機會收取維修費用。

 

※使用此服務時,需要加入Nintendo Switch Online(付費)以及更新《集合啦!動物森友會》的版本至Ver.1.4.0以上,並進行遊戲內的設定。詳情將於日後公布。

※儲存資料無法任意地由顧客復原。如遇主機故障請聯絡任天堂維修服務中心,如遺失主機請洽詢任天堂顧客服務支援。任天堂顧客服務支援電郵地址:[email protected]

※儲存資料(島的資料)暫時不能轉移到不同的主機上。轉移功能預定在今年內發布,有關支援詳情及發布時間將於日後公布。

五木

五木 動漫電玩宅,極愛金田一系列,擅長動作及策略遊戲

追蹤

更多文章