【遊戲評測】類魂遊戲新嘗試 《Mortal Shell》創作新元素同時保留魂味

相信唔少讀者應該有印象,類魂獨立遊戲《Mortal Shell》未推出前我地已經極力吹奏(知道讀者們有自虐傾向 :)),推出後一試之後果然無令人失望,不但充滿住濃烈嘅《Dark Souls》味,同時又加入創新元素,製作出一隻有別具風格嘅類魂遊戲,但難度又比起魂系遊戲低,非常適合魂系新手入坑。

 

 

《Mortal Shell》由獨立團隊 Cold Symmetry 製作,採用第三身視點,係一款類魂動作角色扮演遊戲。又係循例講一講遊戲畫面先,遊戲各類材質及人物模組製作係水平之上,加上整個遊戲活動空間主要都係森林或者地下城,所以都無乜出事位,但亦由於重覆度高所以地圖特色欠奉(唔好期望好似《DS》咁每區分別超明顯),亦都因為呢個原因如果有咩 Miss 咗要返轉頭搵都幾頭痕,亦係呢隻遊戲最大嘅敗筆。

 

地圖重覆度高,但都有部份場景做得幾靚幾有 Feel

 

雖然地圖整得麻麻,但係《Mortal Shell》嘅遊戲系統做得非常好。同《DS》系列唔同,雖然同樣係不死人,但係《Mortal Shell》入面玩家操控嘅角色更接近於「寄居蟹」嘅存在。玩家扮演嘅係一隻不知名人型生物,但係佢能夠入侵屍體並以之與敵人戰鬥,將屍體當做「軀殼」咁穿著於身上。有趣嘅係隨住軀殼嘅不同,能力值亦有所分別,例如有啲就有超強生命值少體力,有平均型,有以超必糟數量取勝嘅(決心),遊戲總共有四個「軀殼」分佈於唔同角落。

 

搵到新軀殼就可以「上身」

要切換軀殼一係就落墓地,一係就要用道具人像

 

另外遊戲中雖然有升級系統,不過就唔係好似《DS》咁有得整唔同「build」,因為《Mortal Shell》玩家係無法更改軀殼嘅生值同體力,只能夠升級對應該軀殼嘅各種被動能力。但無論邊一個軀殼,升級前都有個必經階段,就係必需得知該軀殼嘅名字,先會開啟技能升級清單,而且每獲得一個技能就會得知該軀殼主人生前各種往事,呢個設定不但有創意,亦都好適合魂系風格。

 

同溝女一樣,問咗人地個名先

各種軀殼都有相應能力,例如我最愛嘅聖徒蒂爾就對「毒」免疫

 

戰鬥系統基本上同《DS》差唔多,都係以輕、重攻擊為住,亦存在盾反呢樣野(不過判定時間好微妙),不過《Mortal Shell》同樣有創新嘅系統「硬化」。

「硬化」可以話係《Mortal Shell》最核心嘅系統,玩家可以係任何時間使用硬化變成石頭,呢個狀態下受到攻擊係唔會扣血兼反彈一般攻擊,使用後有大約5 秒左右 CD 時間。比起《DS》嘅盾反、《Bloodborne》槍反,《Mortal Shell》嘅硬化更有靈活性。例如玩家出劍中途發現敵人同時攻擊,結果會做成「相殺」。呢個時候只要喺於出劍時用硬化,擋咗敵人攻擊後再解除硬化,就唔洗扣血又打到人,呢種戰鬥方式非常新穎,令人期待未來嘅發展空間。

 

硬化狀態下攻擊動作只係「暫停」,解除硬化後會繼續未做完嘅動作

軀殼哈洛斯有好多針對「硬化」嘅被動技能

武器數量只有四款近戰+一款遠程,但係大劍揮刀重量感做得唔錯(其他武器懶得升……)

武器強化後會附加一招需消耗超必值嘅必殺技,大劍使用超必後會附加冰屬性,重攻擊斬人會令敵人凍結,不過冰系敵人對呢招免疫

 

類魂遊戲 Boss 戰自然係重頭戲,不過《Mortal Shell》喺呢方面表現就比較遜色。Boss 數量少,攻擊動作單調兼且極易掌握,基本上每隻 Boss 都起碼有 1-2 招露出極大破綻,只要把握呢個機會就可以入一套連技,萬一判斷出錯都仲有硬化救命,而且玩家第一次死的話只會被轟離軀殼,只要行近軀殼再次「上身」就會以滿血姿態復生。呢個設定令到遊戲容錯率極高,整個攻略過程我只有 2 隻 Boss 唔係初見殺,對魂系老手黎講略嫌簡單。

 

避完超多時間打佢……

執返條屍就會瞬間補滿,打王的話就可以特登留條屍喺度唔食,等無血先執,慳唔少水

Boss 呢招大技有 Bug,製造漩渦同時召大量兵仔圍你,但係個漩渦會捲晒堆兵仔入去…….

 

最後想講一講《Mortal Shell》特別嘅道具設定。遊戲入面所有道具初獲得時都並無任何說明,使用第一次之後就會有相關說明,隨住使用熟練度提高,說明及功效都會產生改變,非常有趣。

 

例如露孢菇呢個道具,第一次使用係令你中毒,但當你啪滿熟練度之後,佢就會變成令你毒免疫 120 秒

 

總結:

《Mortal Shell》整體缺點唔少,好似係地圖重覆性高;地下城大小設定不一,有啲勁細有啲大到痴線,令人無所適從;敵人及 Boss 種類少;攻擊模式單一;重玩性低、故事敘事薄弱等等。但佢以類魂遊戲黎講,的確帶黎唔少絕佳嘅創意之餘,亦都不失《Dark Souls》味道,淨係呢點已經好難得。

 

故事敘事薄弱呢點真係好可惜

 

另外對魂系新手黎講,亦都好適合以《Mortal Shell》作為入坑初階。當我再考慮到佢地只係缺乏資源嘅獨立製作團隊,有咁嘅水準真係超額完成,亦成功地令我期待佢地下一隻作品,如果呢排無乜 Game 啱玩的話可以一試。《Mortal Shell》PS4 / Xbox One 版本已經推出,PC Steam & Epic Game Store 則預定於 2021 年上市。

 

編輯部評分:7.5/10 (雖有唔少缺點,但誠意搭救,加上係獨立團隊製作值得支持)

 

 

森麻

VJGamer總編,細細個已經蒲機舖,機齡甚深,熱愛電玩文化。

追蹤

Facebook 更多文章