台灣製作遊戲好多別具創意又有唔錯嘅遊戲性，今次介紹嘅《MO:Astray 細胞迷途》質素亦都非常唔錯，Steam 上更得到「極度好評」評價，加上過多幾日就會推出 Nintendo Switch 版本，絕對值得留意。

《MO:Astray 細胞迷途》係一款橫向動作解謎遊戲，由信仰遊戲開發，最初係佢地嘅大學畢業作品黎，當時已經得到多個獎項。遊戲劇情偏向黑暗風格，玩家扮演一隻青綠色不明生物「MO」，喺充滿怪物及陷阱嘅環境下，提升自身能力及破解謎題穿越重重阻礙。

玩法方面主要都係控制「MO」，切合返佢嘅外型，移動方式同能力都幾特別，初期主要靠黏著、衝撞、寄生三種動作，不過之後仲會學識二段跳、游水等等技能，透過切換能力將會有唔同嘅體驗，當然仲有刺激嘅 Boss 戰玩啦。

黏著：充分運用角色特性穿梭重重機關

技巧：善用敵人，閃避攻擊

另外「解謎」要素係本作入面都非常重要，遊戲中滿佈各種陷阱，除咗利用自身特殊能力之外，好多時要依靠周邊環境物「破解」陷阱。另外「MO」擁有讀取記憶呢個能力，可透過讀取被感染者記憶去了解故事全貌。

《MO:Astray 細胞迷途》PC Steam 版本已經推出，Nintendo Switch 版本將於 9 月 10 日上市。