LEGO 哈利波特 75978 Diagon Alley 斜角巷呢件產品已經喺 9 月 1 日正式開售，今次係繼 2018 年 71043 Hogwarts Castle 後，第二款超過 5000 件嘅LEGO 哈利波特系列產品，亦係暫時總組件數量排第五嘅重量級產品。今次好有趣，正式公佈之後聽到兩個主要問題嚟自兩類受眾，《哈利波特》 Fans 對 75978 Diagon Alley 就冇乜抵抗力架啦，但大家擔心嘅係「聽講有成 1 米咁長，邊有地方擺啊？」；另一類係平時有接觸開 LEGO 嘅玩家，佢地所考慮嘅就係「我都唔係《哈利波特》Fans，開個新坑好似一闊三大喎！」。以上兩大問題我都會喺今次嘅開箱文入解答大家，所以唔講咁多，即刻同大家開箱睇下今年呢盒 LEGO 哈利波特系列 75978 Diagon Alley 斜角巷！

75978 Diagon Alley –  5544 件 – USD $399.99 (香港售價 $3199)

唔好比 1m 呢個長度嚇親，事實上今 75978 Diagon Alley 收埋好多隱藏要素，之後會慢慢同大家拆解

盒背印晒邊棟樓係咩舖頭，呢啲官圖唔再多講啦，開盒睇好過啦！

5544 件組件，4塊 16×32 嘅底板，20加1嘅總共 21 個部份

第 21 部份呢盒，如果有跟開我地報導都應該早知係乜，不過依家都賣個關子唔劇透住先

四棟建築分四本製作說明書，如果鍾意慢慢享受製作過程的話，一星期砌一棟，足足夠你玩成個月

每本製作說明書都會有相關嘅建築同店舖簡介，而最後亦有設計師嘅心得分享

四大張貼紙，未砌之前覺得好多，但除左第 4 部份衛氏巫師法寶店(Weasleys’ Wizard Wheezes)之外，其他三棟建築所用嘅貼紙都還可以接受

貼紙多、印件少，但點解睇出嚟好似內外都咁豐富？全因設計師功力，令到好多嘅細節都能夠用組件可以還原出嚟。依家我地先獨立每棟建築去睇，之後再整體合拼再一次過了解今次 75978 Diagon Alley 嘅過人之處

製作過程

第一部份：奧利凡德魔杖店 (Ollivanders)、疾書文具用品店 (Scribbulus Writing Implements)

第一棟建築包括奧利凡德魔杖店 (Ollivanders)以及電影原創嘅疾書文具用品店 (Scribbulus Writing Implements)，外觀結構上同大家認知嘅都非常相似，四平八穩嘅設計下又可以增加少少改動，令到佢嘅高度、大小可以同其他建築互相配合。

以「偷半格」嘅方法去製造多啲層次感，雖然喺唔同嘅 LEGO 產品都有見過，不過今次喺 75978 用得特別多，出嚟嘅效果當然成功令外觀更賦歐陸風味。

內部嘅細節特別係奧利凡德魔杖店部份，店架上排滿魔杖，而且特登留空部份去放置今次 75978 首次出現嘅無蓋盒組件(6310366 Open Box 1X3)  ，唔洗有得睇冇得玩。

疾書文具用品店 地下

疾書文具用品店 一樓

奧利凡德魔杖店 地下

真係有魔杖收埋喺盒入面架！

條樓梯點解可以收埋？砌完晒全套 75978 你就知佢用處喺邊！

樓梯底亦有擺放魔杖嘅貨架

奧利凡德魔杖店 一樓

獨立睇啲貨架都有好多細節架

第二部份：優質魁地奇用品商店 (Quality Quidditch Supplies)、《預言家日報》總辦事處 (Daily Prophet’s main office)

第二棟建築主力放左喺優質魁地奇用品商店 (Quality Quidditch Supplies)，而《預言家日報》總辦事處 (Daily Prophet’s main office)實際上就只係得個門口，而且招牌同隻門仲要係貼紙，所以可以話有等於冇。儘管《預言家日報》總辦事處部份偷雞偷成咁，呢個都只會影響《哈利波特》Fans 嘅觀感同印像，對 LEGO 玩家嚟講可能完全唔在意，而且望住優質魁地奇用品商店個紅色櫥窗玻璃件 (6315044 Brick 1X2X5, No. 9)，乜野事都順返晒！加上優質魁地奇用品商店嘅地下簷篷做出兩格，令到櫥窗有少少傾前凸出，同《預言家日報》總辦事處嘅大門對比之下更明顯。

重點放左落優質魁地奇用品商店，《預言家日報》總辦事處就只係得條巷(其實最後係解答得到點解會設計成咁，不過去到原整組合後，個答案就會揭搆)，其他四份三嘅空間就比晒優質魁地奇用品商店。而且以服裝店做主題嘅 LEGO 產品可以話少之有少，所以稱得上難能可貴。

《預言家日報》總辦事處 (喎)

其實如果呢幅牆係印刷件，我諗《哈利波特》Fans 都唔會嬲，事關上面印嘅全部都係《預言家日報》嘅頭版嚟架！

你話啊，《預言家日報》總辦事處擺隻蜘蛛喺度做乜鬼

優質魁地奇用品商店 地下，櫥窗公仔著嘅係赫夫帕夫嘅魁地奇服，官方一直冇出過架！

同樣，擺喺一樓嘅雷文克勞魁地奇服亦係首次登場！

最奇怪係最頂嗰層相信係《預言家日報》總辦事處嘅部份，無啦啦多隻老鼠，其實會唔會係榮恩隻寵物斑斑呢？

第三部份：華麗與污痕書店(Flourish & Blotts)、伏林·伏德秋雪糕店 (Florean Fortescue’s Ice-Cream Parlour)

第三棟建築華麗與污痕書店(Flourish & Blotts)以及伏林·伏德秋雪糕店 (Florean Fortescue’s Ice-Cream Parlour)，外觀上可以話同大家印像中嘅好唔同。而四棟建築入面，得佢嘅屋頂係以層疊式設計，相比起其他三棟，佢特別有種古色古香嘅感覺。

書店係要有書架！

係咪覺得熟口熟面呢？個格局係咪同第一棟好似呢？華麗與污痕書店內部就算製作過程平平無奇，望住書店內書架真係擺滿書而感覺，已經補償左今年我對 10270 Bookshop 嘅失望，淨係呢一點已經夠晒滿意啦！

話到明格局一樣，真係有埋條活動梯架！

華麗與污痕書店 地下

書架係要有書架！

華麗與污痕書店 一樓

第四部份：衛氏巫師法寶店(Weasleys’ Wizard Wheezes)、翻倒巷 (Knockturn Alley)

第四棟建築衛氏巫師法寶店(Weasleys’ Wizard Wheezes)配個翻倒巷 (Knockturn Alley)嘅路口，如果大家仲未開始砌呢部份的話，我要比個溫馨提示大家！我不得不講衛氏巫師法寶店呢間舖真係好難搞，為左要做出繽紛色彩嘅感覺，組件又細又多，加上極大量嘅貼紙，真係少啲精神同耐力都好難一口氣完成！所以大家使用前請做足心理準備！

老花兼手震，徒手貼真係唔掂

獨立睇翻倒巷同個「大三巴牌坊」真係差唔幾，得個路牌加個窗，拎走左「Knockturn Alley」張貼紙，真係會完全睇唔出係翻倒巷。相反地衛氏巫師法寶店就真係離遠都認得出，橙色窗框內仲同原設定一樣收埋個巨大人像喺當中，一算係還原得最好嘅一個建築。遺憾嘅係人像頭頂應該有隻「兔仔」，當頂帽拎開嘅時候，大家就可以見得到，可惜因比例同空間問題，設計師決定放棄呢部份。

翻倒巷

後面睇真係弱得滯……

衛氏巫師法寶店

頂帽手動郁得，但係唔見左隻收埋喺帽中嘅「兔仔」，可惜

衛氏巫師法寶店內部可算係中棟建築中最豐富，用上好幾種全新特設組件，加上五顏六色嘅班爛感覺，係 LEGO 哈利波特產品中最精彩嘅設計。雖然內部係咁出色，但大家都留意到頂層因空間不足，就算正常光線下都未必可以睇得清楚當中嘅擺設。

粒綠色 1×1 正方體 (6214446 CREATURE HEAD, NO. 33)，將來應該大有作為

衛氏巫師法寶店 地下

衛氏巫師法寶店 一樓

衛氏巫師法寶店 頂樓

第五部份：斜角巷整體

去到呢度就終於可以解答大家嘅疑問。第一，大家都見到完成後泊埋一齊，無花無假真係一米咁長，睇落仲真係幾誇張，就連我自己個攝影棚都完全唔夠位放。但係原來呢個一米長度係嚇一嚇大家，官方一早就喺設計嘅時候考慮到呢個玩家嘅煩惱，預留左一啲機關比大家慳位擺放。第二，當整體結構改變之後，75978 由四棟得一半嘅建築，可以合拼成為兩棟同 Modular Buildings 配合擺放嘅合拼屋，咁就啱晒儲開屋、砌開街嘅玩家去豐富自己嘅 LEGO City。

之前提到第一棟同第三棟格局一模一樣，其實喺設計時已一早預備好，玩家們可以將兩棟半邊嘅建築合拼成為一棟同 Modular Buildings 一樣大細 (32×32)嘅街景大屋。

一邊係華麗與污痕書店以及伏林·伏德秋雪糕店

另一邊係奧利凡德魔杖店以及疾書文具用品店

合拼之後大家唯一要注意搬運嘅方法，事關兩棟建築嘅接合位置喺底部，而上方一啲連接嘅機關都冇。所以唔好諗位單手拎住其中一邊就穩陣，另一邊隨時跌落地散晒。

另外兩棟所組合出嚟嘅情況

兩棟大屋合拼之後嘅情況，而且組合方法仲可以由玩家自行決定

由呢個角度睇，你就會明白點解《預言家日報》總辦事處會係一條巷仔，而翻倒巷只係得個牌坊，原來係為及兩棟合拼後有令翻倒巷效果更明顯

第六部份：Silencio

今次官方特登喺宣傳同官方圖片度落左好多心思，特登收埋一啲資訊冇直接公開比玩家，就好似呢盒第 21 部份咁，盒上寫住咒語默默靜「Silencio」，砌埋之後仲有塊牌印左海格第一次帶哈利去到斜角巷時所講嘅對白「Welcome, Harry, to Diagon Alley!」，呢啲細心位對《哈利波特》Fans 梗係覺得開心，加上你睇返官方嘅宣傳，都唔多覺眼有個咁嘅牌座以及呢個衣著嘅哈利·波特，呢極罕見而創新嘅手法，希望將來可以將呢個想法普及於其他產品上，令玩家們更多意外驚喜。

第七部份：Minifigures

如果平時冇儲開 LEGO 哈利波特產品嘅《哈利波特》Fans，呢套都叫做一 Set 齊左大部份同斜角巷相關嘅重要角色。但對玩開儲開 LEGO 哈利波特系列產品的話玩家，雖然雪糕店老闆 Florean Fortesque (伏林·伏德秋)、預言家日報攝影師 都係首次 Minifigure 化。而且除 Rubeus Hagrid (海格) 之外，所有 Minifigures 都係今次 75978 獨有。不過拎同期嘅  71028 Harry Potter Minifigures Series 2 一比之下，75978 呢 15 隻 Minifigure 真係明顯喺選角同設計都比下去。就算官方喺 Minifigures 身上加上一啲反光暗花，都彌補唔到對比之下嘅失望。

Harry Potter (哈利·波特)

Rubeus Hagrid (海格)

Hermione Granger (妙麗·格蘭傑)、Ron Weasley (榮恩·衛斯理)

Ginny Weasley (金妮·衛斯理)、Molly Weasley (茉莉·衛斯理)

Fred Weasley (弗雷·衛斯理)、George Weasley (喬治·衛斯理)

Lucius Malfoy (魯休思·馬份)、Draco Malfoy (跩哥·馬份)

Gilderoy Lockhart (吉德羅·洛哈)、Garrick Ollivander (奧利凡德先生)

Florean Fortesque (伏林·伏德秋) 、預言家日報攝影師

Welcome, Harry, to Diagon Alley!

總結

講到呢度都唔再長氣，做個簡單小總結。75978 Diagon Alley 呢盒產品跳出左 LEGO 好多固有嘅做法，玩法、變化比過往嘅 Modular Buildings 或者 LEGO 哈利波特系列產品都豐富。而且因為佢呢個合拼式大屋設計，補嘗左睇落佢得半邊嘅感覺，當然你可以買多盒去補埋後半去變成四棟大屋嘅。佢雖然唔係近年最好嘅 LEGO 產品，但喺 LEGO 哈利波特系列已經數一數二。

最後特別一提整個製作過程中，如果你曾經去過環球影城嘅哈利波特魔法世界，感受應該會更大。事關當你砌緊嘅時候，就好似帶你返到哈利波特魔法世界嘅場景當中，回味當時嘅歡樂，同時又建構緊純於自己嘅斜角巷，整個感受唔只夢幻咁簡單。再加上疫情令大家今個暑假冇辦法外遊，75978 Diagon Alley 可以說得上係一個極好嘅代替品。所以不論係《哈利波特》Fans 定係 LEGO 玩家，特別係儲開街景大屋嘅朋友，都唔可以錯過。

p.s. LEGO Certified Store 仲做緊推廣，買 LEGO 哈利波特系列產品滿 $1000，仲即送你 LEGO BrickHeadz 40412 Hagrid and Buckbeak 一盒，數量有限，送完即止！

• 發售地點：LEGO Certified Store
• 地址：
  • – Langham Place L12 Shop 01B
  • – Times Square Shop 902-3C
  • – New Town Plaza Shop 416
  • – Cityplaza Shop 012
  • – Tuen Mun Town Plaza Shop 2217

• WhatsApp：56826528/ //bit.ly/2Ppt705