【遊戲新聞】PS5 全球炒賣預約煞殺益哂炒家・Sony 道歉並表示會盡快增貨

 

如果你成功預購到 PS5 又唔駛食炒價嘅話,恭喜你!PS5 開始預約當日,唔少朋友都面對死網、遲遲出唔到核證碼、甚至未夠鐘開始預購已經公佈話無貨等等狀況;實體店排隊嘅亦以炒家及排隊黨為大多數,令到唔少真・玩家以及真・PlayStation Fans 都買唔到機(編輯部都搶唔到!)。

呢個狀況唔單止香港,連海外都係,唔少買唔到機,或者「連個預購網頁嘅車尾燈都見唔到」嘅玩家紛紛表示無奈。

作為玩家,見到 PS5 大受歡迎,當然係令人開心興奮嘅事;不過,根據過往 PlayStation 搞活動嘅經驗,假如訂機係可以 PS Plus 會員優先、又或者行抽籤制,或者會改善今次嘅預購風波,亦唔會製造機會比黃牛黨炒買。

PlayStation 官方於 9 月 20 日就於 Twitter 上面道歉,承認聽到各界意見,亦認同新機預購活動可以做得更好,仲表示會盡快提供更多貨量比大家重新預購,有關詳情有待公佈。

 

 

與此同時,網上仲開始傳言話會推出黑色版本嘅 PS5,雖然 PS 推出唔同色系係過往習慣,不過呢個消息目前尚未核實,各位讀者都係參考一下就好。

PS5 作為 PlayStation 次世代主機,將於 2020 年 11 月 12 日正式全球登場;假如你未買到機,請繼續密切留意香港 PlayStation  方面嘅最新消息。

 

 

神婆

遊戲雜食向,FPS 苦手,全種類 RPG 專攻,重度聲優控。使用機種:Xbox Series X|PS5|Nintendo Switch|Steam Deck。

追蹤

Facebook 更多文章