【遊戲新聞】三人合作殺恐龍 《Second Extinction》使用各種槍械光復地球

又有一隻多人合作遊戲即將進行搶先體驗,題材仲要係極受歡迎嘅「打恐龍」!由 System Reaction 開發嘅《Second Extinction》早前公開最新實機遊玩影片,睇片整體感覺非常唔錯,十月個市靜靜地不妨叫埋朋友一齊屠龍。

 

 

《Second Extinction》係一款射擊遊戲,使用第一身視點,最大支援三人線上連線合作。遊戲背景設定地球已被變種恐龍佔領,倖存嘅少數人類已經撤退到太空,為咗驅逐呢班變種恐龍,三人特種部隊被返地球,奪回人類嘅家園。

 

 

喺實機影片入面,展示三名玩家執行嘅任務過程。主菜當然係獵殺變種恐龍,我地見到有速龍呢類小型龍、中型龍三角龍、 Boss 級大型龍暴龍。動作雖然無《Monster Hunter》咁多種類,但係攻擊範圍同方式都幾霸道,唔易玩。另外係較早前片段有展示過執行任務時會遇到速龍群,被圍時非常刺激。至於任務暫時所見主要係救援、研究為主,當然仲有呼叫資源、救援小隊、維修機器等支線任務。

 

 

《Second Extinction》將於 10 月 13 日喺 PC Steam 進行搶先體驗,根據官方遊戲發展圖,會喺今年年底前加入更多種類新敵人、新關卡、新模式、難度、武器裝備、英雄等等。遊戲正式版將會有 Xbox Series X/S、Xbox One 及 PC Steam 平台。

 

 

五木

五木 動漫電玩宅,極愛金田一系列,擅長動作及策略遊戲

追蹤

更多文章