【遊戲介紹】驚慄生存解謎遊戲《Escape Until Friday》五日時間逃離綁架犯凶宅

睇戲成日都見到啲殺人狂魔捉啲受害人返自己屋企殘害嘅橋段,遊戲世界有類似嘅背景故事亦都唔少,但最終都變成啲長篇大論又神又鬼嘅劇情。想要啲簡簡單單短短地又緊張嘅作品,可以試下呢隻《Escape Until Friday》。

 

 

《Escape Until Friday》由 Poly anchor studio 呢間獨立遊戲公司開發,第一身驚慄解謎生存遊戲。故事背景非常簡單直接,就係你被人綁架,綁匪表明星期五就係你嘅「審判日」,而作為玩家就要喺五日之內用盡任何方法逃離身處嘅大屋。

 

 

《Escape Until Friday》同其他解謎遊戲最大不同嘅地方,就係加入左生存要素喺當中。玩家除左要不斷搜索可幫助逃脫嘅道具外,仲要留意住自己嘅體力、精神以及飢餓狀況,唔係嘅話未到星期五就可能已經頂唔住 Game Over。而且喺搜索過程中如果「冇手尾」被綁匪發現你有想逃走蹤跡,你唔只可能會冇野食而影響體力,解開過嘅鎖亦可能會重新被鎖上,增加逃脫嘅難度。

 

 

《Escape Until Friday》已經喺 Steam 平台上架,雖然佢只係隻單機遊戲,但每次開新局,遊戲中所有野(包括解鎖密碼)都會從新隨機生成,所以每次逃脫嘅方法都會有所不同,啱晒鍾意玩解謎遊戲嘅玩家。

 

 

阿九

阿九 打機 - 識少少;玩具 - 識少少;睇戲 - 識少少;動漫 - 識少少..... 買膠、派膠、分享膠!Only The Best Is Good Enough! Lego Enthusiast https://goo.gl/HRnxDW

追蹤

更多文章