【編輯部專題】統一歐美制式按鍵 追溯背後起源歷史小知識

新一代主機十一月就推出,大家都好想知道新機更多嘅資訊,早前備受香港機迷愛戴嘅 Sony 就搵咗一班日本 YouTuber 試玩 PS5 主機,眼利嘅網友發現手制確認由「○」變成了「×」,取消則由「×」變成「○」,亦即係統一為歐美按鍵設置,呢個消息已經由外媒向 Sony 證實。對於呢個改動,有人話好有人話唔好,網上討論區更有人講到矮化日本文化。不過今次呢篇文章就並非討論呢個改動好與壞,反而係想講一下日式同歐美按鍵設置嘅歷史由來。

 

PS5 統一為歐美按鍵設置

 

最早普及嘅家用機任天堂紅白機,手制配置非常簡單,按鍵只有 Select、Start、A、B 四個按鍵,A 鍵放右邊,B 鍵方左邊。當年因為大部份遊戲設計簡單,雖然頻繁地撳嘅制係 A 制(例如《魂斗羅》開槍制),B 制多數係輔助性功能(例如跳躍),所以將 A 制放喺外則比較好撳嘅位置。另外當年遊戲入面選項已經係用「A」確定、「B」取消按鍵設置,而按鍵設置以及按鍵排位呢個傳統去到超任亦都得到保留,甚至一代一代咁流傳落黎(當中有 N64 呢類異數),大家留意一下手上嘅 Switch 按鍵配置同當年超任其實係一樣的。

 

早於紅白機年代,已設定確認用 A 鍵於最右方

後來嘅超任、Wii、Switch 按鍵位置仍然係將 A 鍵放於最右手邊

 

雖然當年紅白機紅透全球,但其實世嘉喺外國可以話同任天堂平分秋色,特別係歐洲地區更為強大。當世嘉推出 Mega Drive 時,就跟街機設定,將手制按鍵分為 A、B、C 三鍵,最左係 A 最右係 C,而又因為亞洲大部份玩家都習慣最右邊係「確定」,所以當時日本廠商都會設定 A 同 C 制都係確定,B 制取消。當然世嘉呢個按鍵傳統亦都被後來嘅 Saturn、Dreamcast 所繼承,到後來就由 Xbox 繼承。(初代 Xbox 係微軟同世嘉合作,亦被喻為「DC 精神後繼機」)

 

Mega Drive 三制同六制版 A 制都係 Set 喺最左邊下方

 

至於 PlayStation 就同 Xbox 嘅開發過程類似,Sony 初代遊戲機係同任天堂合作開發的,後來發生插曲令到 Sony 推出自家遊戲機,亦即係 PlayStation 嘅誕生,亦解釋咗點解 PS 同任天堂按鍵排位一致呢個現象。其實當年 Playstation 總設計師後藤禎祐接受 Famitsu 採訪時,曾經透露管理層要求佢盡量跟返超任控制器嘅設計,因為超任喺當時係取得非常巨大嘅成功,如果徹底改變的話怕原有玩家唔肯升級到 PS。(好在當時 Sony 總裁大賀典雄力排眾議,支持後藤禎祐推出佢理想中嘅手制)

 

傳說中嘅 PS 原版手制,留意圓同叉制係同而家相反的,到底係咪管理層意思已經不得而知

 

除咗手制外型,四粒按鍵採用圖案而唔係用英文字母亦都一反傳統。後藤禎祐要令大家容易記得,於是諗到使用「圓、叉、三角、正方」圖型組合,並賦予每個圖型含義及代表顏色。三角代表「視角」,即係一個人嘅頭部或方向,代表顏色綠色;方型代表「紙」,意思係 Menu 或文檔,代表顏色粉紅色;圓同叉就代表決策「是」、「否」,並將之設定為紅色及藍色,亦都成為 PS 之後嘅代表符號。

 

PS4 按鍵仍然按照後藤禎祐當年設計,但 PS5 按鍵似乎再無顏色之分

 

主機發展歷史就講住咁多先,回歸正題,點解歐美玩家確定、取消按鍵配置會同亞洲玩家相反呢?我認為原因有三。

第一當然係歷史遺留落黎嘅習慣。上面有講到當年世嘉喺外國玩家者眾,手制用 A 做確定 B 取消,而 A 鍵正正就放喺左邊下方,亦即係現時 PS「X」制、Switch「B」制個位。考慮到玩家習慣,Xbox 將 A 制放喺正下方、PS 將下方「X」制設為確定,完全係方便玩家嘅表現。

 

初代 Xbox 按鍵排位同 Dreamcast 一模一樣

 

第二就係對符號認知嘅差異。喺亞洲一般人都會認為圓圈等於「正確」、叉就等於「取消」、「錯誤」等意思,但係歐美地區有習慣將選項打叉識別為「目標對象」,留白即係「不被選中」,所以喺佢地會有「X」係「確定」、「O」係取消呢個認知。

 

亞洲版遊戲 X 制代表取消是常識吧

 

第三就係顏色上認知差異。上面有講到 PS 按鍵「O」係紅色。日本文化中,紅色有代表神聖、吉祥、力量、權威嘅意思(詳細可以睇返魔法洪金寶跳老舞段片),但係西方國家紅色一般都代表「危險」、「禁止」意味,所以對外國玩家黎講紅色嘅「O」代表取消係正常不過嘅事。

 

留意 Xbox 用作取消嘅 B 制同樣係紅色的

 

咁大家明白點解美版 Game 按鍵會同我地掉返轉未 🙂

 

森麻

Avatar VJGamer總編,細細個已經蒲機舖,機齡甚深,熱愛電玩文化。

追蹤

Facebook 更多文章