【遊戲介紹】東方系列類惡魔城橫向動作遊戲《東方月神夜 Touhou Luna Nights》Team Ladybug 大獲好評之作

 

早前同大家介紹過 Steam 上面一隻《羅德斯島戰記》主題橫向遊戲《Record of Lodoss War-Deedlit in Wonder Labyrinth-》,遊戲由 Team Ladybug 開發,於 Steam 平台上面推出之後大獲好評。

Team Ladybug 擅長製作橫向類惡魔城遊戲,早在《羅德斯島戰記》之前,其實亦與日本著名團體 Team Touhou(東方系列)合作,於 2018 年首次推出《東方月神夜 Touhou Luna Nights》,遊戲現已登錄於 Steam、Nintendo Switch 以及 Xbox One 平台上面,同時對應 Xbox Game Pass。

 

《東方》部份經典角色將作為頭目或 NPC 登場

 

遊戲大綱講述女僕「十六夜 咲夜」被紅魔館主人–吸血鬼「蕾米莉亞・斯卡蕾特」傳送去了幻想鄉裡面一個異空間,到底主人目的為何?

雖然話係《東方》主題,但係就算唔係《東方》Fans,假如你係 2D 橫向動作遊戲嘅愛好者,一樣會覺得呢隻遊戲非常出色。主角咲夜會將靈力(MP)化成飛刀作為攻擊武具,同時亦擁有停止時間嘅特殊能力,玩家需要利用呢兩種能力,並配合地城裡面各種機關逃出生天。

 

 

地城中設有一定數量傳送門、儲存點以及回復裝置(汽水機)。平時於戰鬥中,假如成功避過敵人攻擊,亦可以回復 HP,回復數量則按玩家等級而定。同時,玩家可以拎返未能擊中敵人而插在牆上嘅飛刀回 MP,MP 亦可以於靜止狀態中自動回復。以系統黎講,係非常簡單易明嘅設定。

 

 

《東方月神夜》於畫面呈現以及音效設計方面一啲都唔馬虎,畫質細膩,動作設定細緻,靈敏度極高,隨住關卡進程,難度亦有明顯提昇,非常有挑戰性;而每個場景亦起用返《東方系列》嘅樂曲黎做 BGM,對於 Fans 黎講一定額外加分。

 

 

假如你鍾意玩類惡魔城遊戲,呢隻於 Steam 平台上面獲得近乎滿分評價嘅《東方月神夜》相信會適合你。遊戲已經推出,登錄於 Steam、Nintendo Switch 以及 Xbox One 平台上面,同時對應 Xbox Game Pass。

 

 

 

相關文章:

【遊戲新聞】《羅德斯島戰記》動作遊戲化!類《惡魔城》高難度遊戲 3 月登場
【遊戲評測】比月下更上一層樓 《羅德斯島戰記》青出於藍類惡魔城遊戲 

 

神婆

神婆 真身為非典型占卜師,唔神秘,無形象,為咗兩隻貓嘅生活努力奮鬥。日系遊戲及 JRPG 專攻,重度聲優控。

追蹤

Facebook 更多文章