今年年頭果陣我地介紹過一隻恐怖遊戲《Remothered: Tormented Fathers》，其實佢係為咗紀念經典恐怖遊戲《鐘樓》（Clock Tower）而開發（詳情）。佢嘅續集《Remothered:Broken Porcelain》上星期終於推出，再次帶大家進入緊張刺激嘅恐怖世界。
《Remothered:Broken Porcelain》恐怖生存動作解謎遊戲，採用第三身視點。今集舞台設於冰天雪地中，一間對外封閉嘅艾斯蒙旅館。同上集一樣，玩家並無任何槍械又或者強力武器，所有可使用嘅道具都係防禦性質，例如係較剪、空樽呢類物件，只能夠喺危急情況下「頂一頂」，基本上逃跑係你唯一嘅武器。另外上集透過聆聽追蹤者腳步聲，推段敵人大約距離，再決定逃跑定匿藏呢種玩法仍然存在。
今集活動舞台雖然係一間好大嘅旅館，但係活動空間刻意設計得非常狹小，玩家要一邊躲避強力追踪者，一邊尋找可利用資源、道具、一邊解開各種謎題。另外今集喺系統上作出改良，加入新嘅即時運算過場動畫敘述方式，令你更投入遊戲嘅世界。
《Remothered:Broken Porcelain》已於 10 月 13 日推出，對應平台為 PS4 / Xbox One / Nintendo Switch / PC，支援繁體中文。（現時 PC 版好多 Bug，建議買家用機版或者等多陣先入手）
回帶相關文章：
【遊戲新聞】紀念《鐘樓》而開發的恐怖遊戲 《Remothered: Tormented Fathers》NS / PS4 版正式公開發售
動漫電玩宅，極愛金田一系列，擅長動作及策略遊戲