【遊戲介紹】對抗超強聽覺盲眼怪物 《In Silence》唔想死就要靜

早幾年有套電影《無聲絕境》(A Quiet Place),戲中有一種會循聲殺人聽覺超強嘅怪物佔領世界,主角一家人就身處呢個可怕嘅末日世界求生。因為整套電影都極少人聲,各種未知嘅恐懼更憎添恐怖感。最近就有一款遊戲《In Silence》,採用極類似嘅設定,玩家除咗扮演生存者之外,仲可以扮演呢隻怪物,狩獵其他玩家!

 

 

《In Silence》由 Ravenhood Games 製作,係一款多人恐怖生存遊戲,同時屬於非對稱競技遊戲,採用第一身視點,最大支援 7 位玩家同遊。每場遊戲都會有一位玩家扮演擁有超強聽覺嘅怪物,另外 2 – 6 位玩家則扮演生存者,要想辦法逃出生天。

 

 

怪物一方雖然戰鬥力強大又有超強聽力,但視力極低,視野完全係依靠聽覺感知敵人方位及距離,敵人發出聲音越大就睇得越清楚。不過扮演怪物嘅玩家要注意強力電筒、閃光彈呢類可以產生強光嘅物品會將你擊暈,盡量引誘敵人使用手上嘅道具吧!

 

 

至於生存者一方亦都唔係只有捱打一途,可以選擇尋找零件修理汽車逃生,又或者搵武器嘗試擊殺怪物,不過要注意一旦打開武器庫,怪物就會被激怒,呢個狀態下嘅怪物可以喺跑步狀態下擊殺生存者。不論玩家選擇邊種方式,進行過程中難免會發出聲響,玩家可以利用地上嘅玩具、開著電視呢類周邊物品擾亂怪物嘅聽覺,從而爭取時間。

 

 

多人連線狀態下,玩家可以根據與其他玩家嘅距離進行語音聊天,不過要小心怪物同樣聽到你地講野嘅聲音的,謹慎地選擇何時講野吧(當然你可以用 Discord 嘅…….)。另外生存者一方玩家死亡後並唔係完結,死者將化身為老鼠,可以幫手尋找物品或者分散怪物嘅注意力。

 

 

《In Silence》喺 Steam 做緊搶先體驗,如果喺 10 月 24 日前購買的話仲有 8 折,只需要 HKD $41.6,極之抵玩。

 

五木

五木 動漫電玩宅,極愛金田一系列,擅長動作及策略遊戲

追蹤

更多文章