【遊戲新聞】Xbox 恐怖大作宣佈延期 《Medium》受疫症影響將延期一個月

訂咗新世代主機 Xbox Series X/S 嘅玩家應該聽日就收到機,十一、十二月大家主力都係玩住《Watch Dogs: Legion》、《Assassin’s Creed Valhalla》、《芬尼克斯傳說》Ubisoft 三寶(唔計 Game Pass 啦)等新 Game。當中最令人期待嘅,一定有原定十二月推出嘅 Xbox Series X/S 獨佔大作《Medium》,可惜琴日開發商突然喺 Twitter 宣佈遊戲將正式延期。

 

 

Bloober Team 日前喺 Twitter 出咗條 Tweet,入面話《Medium》延期係一個困難嘅選擇。但由於波蘭疫情嚴重,所以只能無奈地延遲發售日期。雖然遊戲延遲推出,但佢地會利用呢段額外嘅時間去再一步提升遊戲嘅品質,當遊戲上市時會令玩家得到一款創新嘅互動心靈系恐怖遊戲。

 

 

《Medium》由曾開發《Layers of Fear》《Blair Witch》《>observer_》等作品嘅 Bloober Team 製作,係一隻心靈系恐怖遊戲,採用第三身視點。故事舞台為波蘭嘅克拉科夫市,主角為左尋找事情真相,因此來到曾經發生大量慘劇嘅廢棄酒店。玩家飾演嘅女主角「瑪麗安娜」一直被惡夢幻影纏繞,於是陷入精神錯覺裡面,經常於現實與靈界往返同時進行探索,利用兩邊嘅視角解決各種難題,詳情可睇下面條實機遊玩片段。

 

 

值得一提嘅係本作邀請到製作《Slient Hill》音樂嘅作曲家山岡晃,聯同負責《Layer of Fear》音樂嘅 Arkadiusz Reikowski 為本作配樂;而最新公開片段中嘅 BGM(同時為女主角主題曲)的「Marianne’s Theme」目前正於 Steam 平台上免費供下載中。

 

 

《The Medium》原定於 2020 年 12 月 10 日上市,現延期至 2021 年 1 月 28 日上市,並同步於 Xbox Series X/S 及 PC Steam 平台推出,即日對應 Xbox Game Pass。

 

五木

五木 動漫電玩宅,極愛金田一系列,擅長動作及策略遊戲

追蹤

更多文章