PS5 重點首發作品《Marvel’s Spider-Man: Miles Morales》基本上係買機必玩作品，加上喺之前嘅影片見到兩代蜘蛛俠聯手制敵，都真係好吸引。今次我哋同樣得到媒體試玩邀請，喺遊戲未出街搶先一步體驗新作，順便同 PS4 Pro 版做少少比較。

本文所有 PS5 圖片皆採用 Fidelity 保真模式下截取

《Marvel’s Spider-Man: Miles Morales》故事接續《Marvel’s Spider-Man》，講到 Peter 發現 Morales 同樣擁有蜘蛛能力，然後訓練佢成為另一位蜘蛛俠，所以遊戲開始時係會同時有兩代蜘蛛共同出戰。由於有媒體限制，所以今集劇情唔會透露太多，留返俾大家慢慢享受。

遊戲推出前 Sony 大肆宣傳，官方亦力 Sell 新主機加入光影追蹤製作反射效果（Ray-Traced Reflections），畫面比起 PS4 Pro 更精細，不過我地實際測試結果就有種「理想與現實」嘅差距。喺 PS5 上畫面細緻度的確有所提升，但只係細位上作出強化，例如衣服上嘅毛更清晰、頭髮表現更精細、金屬材質處理較好等等，不過如果只睇單獨一幅圖的話就唔係太感受到 PS4 Pro 同 PS5 嘅分別，喺呢個部份略嫌有啲誇大。

主力宣傳嘅光影追蹤製作反射效果，實機表現下的確反射倒影比 PS4 Pro 清晰

當然分別係有的，留意衣服上嘅毛，左邊 PS5 版本表現明顯較細致，清楚睇到係「一條條毛」，反觀右邊 PS4 Pro 就相對做得無咁靚

細心留意一下，右邊嘅 PS5 頭髮表現 更有層次感

但其實好多細節都係細心睇先會發現，並唔係宣傳入面講得咁勁咁明顯

呢張我就唔特別註明，一邊係 PS4 Pro 一邊係 PS5，可以試估下邊部份出自 PS5

作為第一隻護航作品，可能呢未夠經驗，所以畫面強化唔太明顯，但如果只計流暢度的話就有明顯分別。實試 120fps 係非常有感覺，特別係高速移動下感覺更「順」。至於玩法同《Marvel’s Spider-Man》大同小異，只係多咗一招毒液拳同範圍技毒液震擊，其他野就同舊版大致相同，所以唔會多講，有興趣嘅可以睇返舊版嘅感想評測。

輔助小道具、收集戰衣等元素同舊版大同小異

新招毒液拳畫面表現係型嘅

總結：

《Marvel’s Spider-Man: Miles Morales》作為護航作品，有種「趕住出街」嘅感覺，雖然遊戲保持水準同舊版一樣好玩，但係畫面上未見有太大進化，無果種開 Game 「嘩」一聲嘅感覺，亦唔太 Feel 到有幾新世代，特別製作團隊並無喺 Sony 力 Sell 嘅新手制 DualSense 震動功能落功夫，震動位置、感覺同 PS4 Pro 一模一樣（特登同時開住兩部機同步試），相信有多啲時間製作的話會做得更好。

戰鬥、潛行等同上集差唔多，畫面表現喺戰鬥中亦未見有太大差距，估計係唔夠時間摸 PS5 機能，相信啲出的話表現會更令人驚艷

《Marvel’s Spider-Man: Miles Morales》絕對係一隻好遊戲，整體遊玩時間都有大約 8 – 10 小時，以動作遊戲黎講算係咁。不過 PS4 版本就 12 號出街，考慮到升級嘅畫面真係唔算太明顯，所以真係無乜必要急住為佢買 PS5 版本。如果有 PS4 Pro 嘅玩家就更加唔洗急住同人搶機，玩 PS4 Pro 版就 ok。至於無 PS4 Pro 嘅玩家，就真係建議換機啦，因為 4K 真係差好遠的。

最後提提大家，PS5 豪華版會送埋《Marvel’s Spider-Man》Remastered，都抵玩嘅。

編輯部評分：8.5／10 （蜘蛛俠本身已經做得唔錯，絕對係一隻好遊戲，值得一玩）