【遊戲感想】一代經典 JRPG 劇本極出色《真・女神轉生III NOCTURNE HD REMASTER》系統提昇有更現代化空間

 

Altus 於 2020 年 10 月 29 日推出《真・女神轉生III NOCTURNE HD REMASTER》(下稱《真女神 3》),為 2003 年 PS2 遊戲《真・女神轉生III NOCTURNE》嘅高清版本;新版對應 PS4 以及 Nintendo Switch。作為一個未玩過初代《真・女神轉生III NOCTURNE》嘅玩家,當然要把握機會去感受一下呢隻當年嘅經典名作。

比較年輕嘅玩家,或者對《真女神》系列嘅認識都來自其副線《Persona 女神異聞錄》系列,但係其實作為「始祖」嘅《女神轉生》以及《真・女神轉生》系列,無論於故事、或者當年於系統上面嘅革新(相關文章),都絕對係值得玩家重溫之作。

 

 

當然,遊戲原身畢竟為十多年前嘅遊戲,PS2 畫面就算進行高清,都無可能以現代遊戲畫面水準去比較,但相較當年,自然已經美化許多。不過,畫面/畫質對玩家感受《真・女生轉生 3》嘅影響其實好細,遊戲真正引人入勝之處,絕對係佢嘅劇本同故事。

故事一開始就世界毀滅,因為「惟有毀滅才能重生」,類似嘅故事理念,似乎於九十年代嘅日本非常盛行;但係《真女神 3》嘅特別之處,就係無強逼主角(玩家)強行只能成為傳統嘅「救世主」角色。

遊戲中將世界滅亡形容為「東京受胎」,事情發生之後,東京變成一片荒蕪,滿佈惡魔。玩家因為某種原因,意外存活,卻同時被強行植入名為「禍魂」嘅神秘惡魔之力,成為「人修羅」。

 

主角因為獲得「禍魂」身上才會出現青色刺青

 

力量令玩家可以於末世裡踏上旅途,而旅途路上你會遇上其他角色,每個角色對於「新世界」都有不同嘅想法。到底最後主角會認同造成「東京受胎」嘅破舊立新理念,抑或要對抗呢一種殘酷嘅做法,就有待玩家於遊戲中慢慢探索了。

 

 

角色理念各有不同,各個 NPC 於遊戲中會亦不斷提出各種「屬性問題」,隨住玩家每次的選項不同,你所選答案就會為背後隱藏嘅「理念方向」加上分數;故事最後結局,就會根據得到最高分數嘅「理念」而產生變化。

 

 

呢種隱性多元結局嘅遊戲玩法,對於現代玩家黎講,或者已經十分常見;但其實呢種系統,於當年黎講絕對係一個大膽前衛嘅設計。雖然係一隻十幾年前嘅作品,不過,「一片混沌嘅世界」以及「到底你想如何生存下去」等等嘅故事大綱,其實與現在嘅社會巧合地有些許相似之處!

所以,認真建議首次開 Game 嘅朋友,雖然網上攻略很多,不過還是嘗試跟隨自己直覺去遊玩遊戲的第一周目吧!咁樣先能夠得到劇情安排上面最大的樂趣。

 

 

遊戲採用隨機遇敵方式、回合制。玩家於每場戰鬥中,可以同時說服大部份敵人成為你嘅「使魔」,而唔同嘅「使魔」都會有唔同嘅屬性/弱點/技能(攻擊向或輔助技能向)。

比較有趣嘅係,假如係陷入精神狀態嘅敵人、又或者部份不能夠進行正常溝通嘅敵人(例如泥漿怪)就不可以經由「談話」收服;但係可以於特定場所,將手上嘅「使魔」進行合成。呢部份嘅要素於《Persona 女神異聞錄》系列中亦有沿用,相信玩過嘅玩家絕對不會陌生。

當然,前人種樹,後人乘涼;而家玩家只要上網一搜,就可以搵哂所有「使魔」嘅特性以及合成組合表,不過當年呢種「將敵人收為己用」以及「孕育惡魔」嘅想法非常創新;而系統經歷過前面幾集《真・女神轉生》之後,黎到《真女神 3》,亦可以話係進化得最爐火純青嘅一集。

 

於戰鬥中可以展開「談話」(敵人血量低時成功機會越高)

大部份敵人會提出條件,例如從玩家身上獲取 HP / MP / 道具,又或者係單純問你問題(同你啱傾嘅就會加入你!)

 

同一戰鬥當中,玩家可以同時帶領三隻「使魔」上場,但係自己嘅能力亦都好重要。玩家於遊戲當中會收集到唔同嘅能力裝備,例如係擅長物攻的、或者係專長各種屬性魔法的,到底要點樣配合戰鬥組合,都係玩家嘅挑戰之一。

戰鬥非常重視玩家對敵人嘅了解,從而針對弱點展開攻擊;成功進行弱點攻擊就能夠產生「追擊回合戰鬥」。戰鬥中,每個登場角色會獲得一個「符號」以示出擊次數。一般而言,每行動一次,就會消耗一個「符號」;但如果玩家成功攻擊敵方弱點、或者產生 Critical(爆擊)的話,就可以行動多一回合。善用呢個機能,先能夠於戰鬥中獲勝,不然就只會被敵方乘勢一口氣擊潰。

敵人或者有多於一個屬性或弱點,亦有部份敵人有能力增加戰場上伙伴,所以玩家不能夠只靠一個隊伍就爆機,多參與戰鬥、多收服使魔、多進行合成,全部元素加埋先係《真女神 3》戰鬥嘅全部。

 

官方圖片

 

不過,以一隻「高清化嘅舊遊戲」黎講,想吸引新玩家入坑,系統上面亦有一啲可以改善嘅地方。其實市面上有唔少其他舊 Game HD Remaster 都會加入「兩倍速戰鬥」以及「探索移動速度提昇」令到遊戲進行更快,假若同系列作品未來會繼續高清登場,絕對可以考慮加入呢個功能。

 

地圖經常要來回走,隨機遇敵+唔夠 MP+進行速度慢,都幾需要玩家耐性

 

畢竟現代玩家未必個個都咁有心機專心攻略一隻遊戲,而《真女神 3》係一隻需要玩家練 Level、以及不斷於區域來回探索去推進劇情,假如於戰鬥速度、移動速度方面可以增加 Speed Up 選項,相信對於慕名入坑、但又生活繁忙嘅現代玩家黎講,會更為 User Friendly。

有興趣嘅玩家亦可以考慮同時入手埋 DLC。遊戲內置難度為「Normal」及「Hard」,玩家亦可以同時下載免費 DLC 去獲取針對新手而設嘅全新難度「MERCIFUL」(相當於 Easy)。

 

 

首個付費 DLC「Maniacs Pack(マニアクスパック)」亦與遊戲於 2020 年 10 月 29 日同步上架;《Devil May Cry》主角「但丁」將會作為「仲魔」角色登場。但丁原為 PS2 版本與《真女神 3》Crossover 嘅角色,黎到 2020 年嘅版本就轉變為付費 DLC 再登場。

購買付費 DLC 「Maniacs Pack」嘅玩家,將會在標題畫面新增「New Game -Maniacs-」選項,從而在但丁登場嘅情況下進行遊戲,並可與但丁共同戰鬥及進行互動。DLC 同時加入地城「阿瑪拉深界」、新類型使魔、以及解除該使魔於合體上嘅限制,同時亦有新技能「貫穿」及新結局。

 

 

對於當年未玩過《真女神 3》嘅朋友黎講,呢隻有高清以及官方中文化嘅《真・女神轉生III NOCTURNE HD REMASTER》,係一隻唔錯嘅收藏兼復古之選;喺系列最新作《真・女神轉生 V》尚未正式推出之前,大家亦不妨重溫、感受一下呢隻一代經典嘅精彩之處吧。

編輯部評分:8 / 10

 

 

順帶一提,《真・女神轉生 V》已預定於 2021 年推出,目前公佈對應平台為 Switch,繼續以現代東京作為故事舞台。玩家將飾演一位高中生,在沙漠化嘅廢棄東京,遇上揚言「神已逝去」嘅惡魔,可以話係《真女神 Fans》以及 RPG 愛好者來年嘅必玩之作。

 

 

《真・女神轉生III NOCTURNE HD REMASTER》已經於 10 月 29 日上架,對應 PS4 及 Nintendo Switch 平台。

 

神婆

神婆 真身為非典型占卜師,唔神秘,無形象,為咗兩隻貓嘅生活努力奮鬥。日系遊戲及 JRPG 專攻,重度聲優控。

追蹤

Facebook 更多文章