【遊戲新聞】遊戲廠商對玩家消費力抱信心 擬提高 3A 級大作售價

3A 級大作初推出市面時一般售價大約係 HKD $450 左右,其實呢個定價係源自 $60 美金,而且呢個定價喺 1990 年代已經存在。三十年間,絕大部份 3A 大作都係維持喺呢個價格水平,不過根據外媒 Bloomberg 報導,部份廠商已將部份新世代遊戲售價提升至 $70 美金。

 

 

根據報導,部份開發商早就有呢個打算,最主要原因係通貨膨脹以及喺新世代主機製作 3A 大作成本持續上升,而首批調整價格嘅遊戲好快就會喺新主機出現,例如《Call of Duty: Black Ops Cold War》、《Demon Soul》、《Godfall》、《NBA 2K21》,每款都將訂價調整至 $70 美元。有趣嘅係,原來 SONY 曾經想將售價提升至更高水平,不過內部聲音不一,認為過度提高定價呢個行為會令玩家討厭。

 

 

 

 

為咗要玩家拎更多錢出黎買 Game,遊戲廠商發展出各種商業模式。例如包含遊戲裝備、Season Pass 等等嘅高級版、額外發售 DLC,又或者係 Figure 嘅限定版等等。不過根據遊戲產業研究機構  IDG 諮詢公司總裁大崎義雄所言,並非所有發行商都會以 $70 美元價格推出新世代主機遊戲,但預期會越黎越多遊戲以 $70 美元發售,因為遊戲價格明顯並未如電影戲飛、Netflix 等價格「與時並進」。

 

 

當然價格呢樣野最主要都係睇返遊戲廠商嘅取態,Capcom 要去到下年先有新世代主機遊戲,佢地將會以「title-by-title」嘅方式去為每款遊戲定價,並認為遊戲價格應該係取決於消費者意願,而唔係取決於用咗幾錢開發遊戲。至於 EA 會喺未來六至九個月內確定新世代遊戲定價,現時最大嘅兩款體育遊戲則會提供免費升級至新世代主機版本。

 

 

新世代主機遊戲加價似乎勢在必行,但不得不留意嘅係微軟陣營提供嘅訂閱制服務 Xbox Game Pass,最平只需要加多 HKD $10,就可以有長達三年嘅訂閱服務,無限次暢遊過百款不停更新嘅遊戲。其他平台如 Google Stadia、Apple Arcade 亦有類似嘅服務,絕對會改變玩家長久以來購買遊戲嘅習慣。

 

五木

五木 動漫電玩宅,極愛金田一系列,擅長動作及策略遊戲

追蹤

更多文章