【遊戲介紹】小小大星球系列登場 PS5《Sackboy: A Big Adventure》同細路|休閒玩家一齊玩嘅輕鬆之選

 

PS5 主機已經於 2020 年 11 月 12 日於部份國家首發,雖然訂到機嘅香港玩家要到 11 月 19 日先至拎到機,不過對應 PS5 平台嘅幾隻新遊戲已經開始推出市面,包括《Sackboy: A Big Adventure(下稱 Sackboy)》,已經與主機同步推出,同時對應 PS4 及 PS5。

《Sackboy》為《小小大星球(LittleBigPlanet)》系列嘅最新作品。《小小大星球》於 2008 年時首次面世,為 Sony 旗下工作室 Media Molecule 嘅主打遊戲,今次嘅《Sackboy》係系列作嘅第四隻作品,與前作一樣,為一隻風格輕鬆得意嘅探險遊戲。

 

利用地形進行移動

 

玩家將飾演主角布娃娃,因為邪惡勢力費克斯綁架你嘅朋友,又揚言要破壞你嘅家園,所以你隻身上路,要成為拯救朋友家園嘅勇者。整個遊戲分為唔同關卡,關卡佈置設計各異,包括叢林、水邊、太空等等場景;而玩家於關卡中獲得嘅金幣可以用黎購買外觀,各關卡亦具有一定收集要素。

 

可用金幣購買外觀

 

PS5 版本《Sackboy》非常強調手掣震動元素及毛冷步行質感(觸覺回饋),對於鍾意呢種機能嘅玩家黎講或者會增加投入度;如果你同我一樣唔太喜歡震動機能,亦可以於 Menu 取消點選震動選項。

 

於毛冷上步行會有觸感變化

 

同時,《Sackboy》對於一般玩家黎講,難度偏低,遊戲裡面嘅敵人大部份一下可打死,頗為適合休閒玩家或者小朋友遊玩。假如小朋友太細個,唔識操作,搞到成日跌落街,你仲可以勾選「無限生命數」選項,咁就玩極都有,玩幾耐都唔死,絕對適合你幾歲嘅仔女拎住手掣亂撳亂衝。

 

 

當然,《Sackboy》作為休閒|手痕|消磨時間,亦為不錯之選,操作簡單易明,而且可以 Local/Online 聯機同朋友玩,表面上同朋友合力,實際上就係鬥快拎到最多嘅金幣,又或者係鬥快打對方落街等等,多人遊玩時玩法可以更多樣,要如何從中獲得樂趣,就留待大家自由發揮。

要注意嘅係,線上多人遊玩要去到 2020 年底先會透過遊戲更新方式開放,不過 PS4 與 PS5玩家就可以跨平台聯機,同時 PS4 Save Data 亦可以過繼到 PS5 上面。

《Sackboy: A Big Adventure》,已於 2020 年 11 月 12 日推出,同時對應 PS4 及 PS5。

 

神婆

遊戲雜食向,FPS 苦手,全種類 RPG 專攻,重度聲優控。使用機種:Xbox Series X|PS5|Nintendo Switch|Steam Deck。

追蹤

Facebook 更多文章