【遊戲介紹】「法治仲係有險可守」《I am Your Lawyer》超考腦力律師打官司模擬遊戲

 

曾經有人喺香港大嗌過「我哋嘅法治仲係有險可守,over my deadbody」,到底香港而家法治情況係點,我地呢啲小市民就真係唔係好清楚;不過遊戲工作室 Games Incubator|PlayWay 就於 11 月 13 日發表全新律師模擬遊戲《I am Your Lawyer》,對應平台為 Steam,正式推出日有待公佈。

遊戲以美國司法界為背景,玩家飾演律師,而你嘅客人,大多為被警察夾硬屈做犯人嘅「嫌疑人」。為咗證明你嘅 Client 係清白,你需要由查證做起,走訪各個地方,務求搵到更多線索、或者證據,先能夠到法庭上面為 Client 洗脫嫌疑。

 

 

玩家需要與 Client 對話,例如係有無不在場證明、了解被當成犯人嘅原因;亦可以到警局查閱資料,或者檢視證物、驗證指紋、查看閉路電視等等。

 

 

因為美國大概仲有法治可守,所以警方未必對你友善,但起碼會配合調查,要睇閉路電視亦唔需要等幾個月,呢啲部門之間嘅合作,都有利於玩家收集更多證據以及上庭用嘅資料。

 

 

玩家亦可以尋求專業人士協助,例如係化驗師、法醫等等,同時需要走訪案發現場、以及你認為與案件有關係嘅場所,嘗試去搵出對 Client 有利嘅證人或者證據。

到上庭之時,玩家需要善用手頭上證據,細心留意控方嘅指控,一旦出面無理攻擊或者錯誤陳述,就要即時進行反擊;同時要注意自己庭上表現,好讓 Client 得到陪審團嘅支持。

 

 

《I am Your Lawyer》係一隻非常仿真、亦非常考驗玩家分析能力嘅模擬遊戲,目前語言對應英文及殘體中文。有興趣嘅玩家,記得先將佢擺入 Steam Wish List 啦!

 

 

神婆

神婆 真身為非典型占卜師,唔神秘,無形象,為咗兩隻貓嘅生活努力奮鬥。日系遊戲及 JRPG 專攻,重度聲優控。

追蹤

Facebook 更多文章