【遊戲短評】勁好玩種米模擬器 《天穗之咲稻姬》落田及戰鬥皆令人欲罷不能

《天穗之咲稻姬》(天穂のサクナヒメ)公佈初期無乜人留意,推出後因為超認真嘅耕種系統意外地喺外國引發熱潮。實際上,我地遊玩時發現淨係落田都勁多野玩,加上出外探索戰鬥亦都做得好玩兼有難度,絕對係近期令人玩到停唔到手嘅佳作。

 

 

《天穗之咲稻姬》由工作室 Edelweiss(えーでるわいす)開發、Marvelous 及 XSEED Games 發行,官方定位話係動作 RPG,但其實只啱一半,因為耕種模擬部份喺本作佔極重要地位。遊戲絕大部份時間都係農務 > 打怪探索 > 農務 > 食飯 > 農務 > 休息,但唔好以為成日都要落田等於好悶,相反做農務先係呢隻遊戲最大嘅樂趣。

 

 

遊戲內各種農務設定極為專業呢樣相信大家都知,每個季節每一期都有相應嘅工作,插秧、施肥、曬田、打穀等等所有現實農務要做嘅步驟 100% 忠實還原,而且遊戲中會只會提供極簡單嘅意見,提議你幾時要做咩,但係呢個所謂嘅建議只係得一句說話。要真正了解作物培育嘅方法,只有查相關嘅資料,所以點解之前有報導日本農林水產省網站突然勁多人查詢就係呢個原因。又因為咁,所以淨係種田已經用勁多時間,不過我覺得值得的,話晒真係學到野。

 

所謂嘅建議只係得一句說話,然後要靠你自己摸索……

 

種田以外玩家需要探索島上其他地方,探索關卡以橫向卷軸動作遊戲表達。一般關卡中會得到各種素材,用以升級武器防具及得到各種食物,部份關卡會有巨大 Boss 挑戰,亦都頗有難度。又因為本作並無等級系統,卡關的話就只有努力種米食肥啲令角色得到強化。我就曾經嘗試用技術去補救角色能力不足問題,結果係失敗的。當角色能力不足,越級挑戰怪物時,不論任何攻擊都只會扣 1,而且隨時間過去,入夜後敵人能力會大幅強化,同時視野會變得極低,極之不利戰鬥,所以都係乖乖地返去種米啦。

 

前期 Boss 都仲可以靠技術勉強打贏,但遊戲都係主張玩家循序漸進,都係乖乖地返去種米啦

 

雖然 Boss 戰被角色能力所限制,但唔代表玩家成長到與敵人同水平後可以輾壓過去。遊戲基本戰鬥概念以最簡單嘅方式講就係「打背」,玩家面對敵人用「羽衣」就可以飛去佢背面,但係 Boss 們有同樣有各種招式封位。例如「鹿鬼」會快速移動,有對空技、霸體技,一不小心就會被換血。呢度分享個小技巧(唔覺眼教學有講),就係使用「Parry 技」。只要睇準敵人攻擊差唔多打中時,將方向桿往敵人方向推前,成功的話就會擋開敵人攻擊,同時令敵人產生硬直,反覆利用此技巧即可玩弄敵人。

 

Parry 成功敵人會變成紫色,呢個時後可以打到佢浮空

 

總結:

《天穗之咲稻姬》係一隻超級黑馬,種田、戰鬥部份都極之好玩,人設及畫風可愛有趣,實屬難得佳品。XSEED Games 用實力同誠意證明一隻遊戲好與壞,係由成品品質所決定,並唔係開 Game 頭一小時劇情整死主角就叫叻叻。

想品味一隻充滿誠意嘅作品,誠意推薦《天穗之咲稻姬》,不過玩之前麻煩先做好心理準備,因為真係好毒。

 

推薦度: 9 /10

 

五木

五木 動漫電玩宅,極愛金田一系列,擅長動作及策略遊戲

追蹤

更多文章