現時受歡迎嘅卡牌對戰遊戲主要都係果幾款，不過因為多數係手機平台，要玩家課金抽卡在所難免，而呢個亦係令唔少人卻步嘅原因。最近熱門卡 Game《闇影詩章》就出咗家用機版本，唔洗額外課金抽卡兼且好玩卡靚聲優正，絕對係新手入坑最佳選擇。
家用版叫做《闇影詩章 霸者之戰》，以播放中嘅《闇影詩章》動畫為藍本製作，係一款卡牌對戰+角色扮演遊戲。遊戲中玩家會以自創角色擔任主角，並與一眾動畫角色互動展開劇情，呢點同手機版有所分別。至於劇情就講述闇影詩章社廢部在即，各社員為打破命運，以贏得全國大賽為目標。
部份劇情會以動畫型式表達，真係算係咁
卡牌設計同聲優都非常高質
角色扮演部份感覺略為簡單，雖然玩家可以自由活動前往「貓目鎮」、「闇影詩章場館」等地區，但係可供探索及互動嘅地方比較少，多數都係簡單傾計任務同埋執寶箱，淨低嘅就係對戰 NPC，玩家要儲新卡牌最快嘅途徑就係打呢啲 NPC 啦。另外玩家雖然有得升級，但各職業升級後都係只係獎勵錢或者卡牌，對能力值無任何影響，呢點值得一讚的，因為咁做的話就唔會影響卡牌對戰平衡度，勝負真係睇返對戰雙方技術。
可供探索及互動嘅地方比較少，多數都係簡單傾計任務同埋執寶箱，有進步空間
卡牌運用得好，越級打完全唔係問題
遊戲以卡牌對戰為中心，不過暫時就無動畫入面嘅 2 vs 2 模式，都係用返手機版單對單打法，喺呢度都順便簡單講下《闇影詩章》嘅玩法。
喺《闇影詩章 霸者之戰》入面，七種職業玩法各異，例如反打型吸血鬼、瞬速增加出牌成本值嘅龍族等等，當中又分為快攻、中速、跳費等戰術策略。玩家可以喺七個職業中選擇一位，然後跟返職業構築卡組（DECK）與對手展開對戰，當任何一方主戰者生命值歸 0 時即為敗北。遊戲特色系統「進化」擁有扭轉局勢嘅力量，經過一定回合後，玩家可以消耗進化點進化從者。進化後嘅從者將增加攻擊力及生命值（部分例外），仲可以立即攻擊敵人從者，判斷進化時機可多時係勝利關鍵。
當然，對新手黎講上面果堆野可能已經唔知我講乜，特別係「砌 Deck」呢個極需要思考嘅步驟。好在《闇影詩章‧霸者之戰》收錄卡牌係手機版第三次改版「巴哈姆特降臨」600 多張卡再加部份原創卡片，網上面搵到嘅舊版砌 Deck 資訊喺本作完全適用，就算係新手都可以跟住砌，然後再慢慢學習改良自己套 Deck。
就算真係唔識砌 Deck 都唔緊要，遊戲入面有好多預設牌組，組合都唔差的
買卡機有得逐張卡買定係買卡包抽，唔洗課金，用遊戲幣就得
最後略略講下網上對戰部份，現階段都算易搵到對手，打咗幾場都係唔洗一分鐘就配對到，亦無斷線或 Lag 機等問題，可以放心遊玩。
總結：
《闇影詩章 霸者之戰》雖然以動畫為藍本，但始終主打內容都係卡牌對戰，質素上絕對令人放心，最主要原因係遊戲中出現嘅卡牌絕大部份都係用返手機版果啲，而《闇影詩章》本身就有搞開世界電競比賽，平衡度、遊玩性完全唔係問題。
另外喺卡牌戰鬥規則說明方面，有非常詳細嘅解說，就算專業用語「回手」、「打臉」、「卡手」等都有相關說明，對新手可謂非常體貼。對老手黎講，霸者之戰新增多張原創卡片，就算玩返舊 Deck 都有新變化，而且新傳說卡出場果陣仲有戰鬥動畫，又唔洗課金抽卡，老實講都幾吸引。
《闇影詩章 霸者之戰》已經推出，對應平台為 Nintendo Switch，支援繁體中文字幕。
推薦度：8 / 10（對新手友善，系統極之完善）
VJGamer總編，細細個已經蒲機舖，機齡甚深，熱愛電玩文化。