早喺今年六月果陣，肯德基話會出一部叫做「KFConsole」嘅遊戲主機，雖然有晒圖，但係大家都當佢吹水玩野，特別係早排《Cyberpunk 2077》延期果陣，KFC 又玩埋一份話「KFConsole」會延期，成件事吹水味更濃。勢估唔到，肯德基今日就正式發表「KFConsole」，仲要真係可以拎黎炸雞！

「KFConsole」係同 Cooler Master 合作嘅遊戲主機，暫時未有完整主機規格，不過喺根據已公開嘅資料，一啲都唔弱。主機採用 Intel NUC 9 Extreme 搭載 Intel Core i9-9980HK CPU，顯卡就使用 ASUS RTX（估計唔會低過 3070） ，系統硬碟使用 PCIe NVMe SSD 及配備二隻 Seagate BarraCuda 1TB SSD，支援 VR 及光線追蹤，最高支援 4K/240FPS 輸出。

就咁睇主機效能非常接近一台高階電腦，但未知係咪用返 Windows 定係會開發自家 OS，遊戲陣容亦都不明，但係搵得 Cooler Master 合作都應該唔會吹水。

主機硬件有返咁上下，內置嘅焗爐都唔弱。根據官方網站介紹，焗爐用咗「Chicken Chamber」專利技術，會利用主機硬件產生嘅熱量，透過氣流系統幫焗爐入面嘅雞肉保溫加熱，等大家可以邊打機邊食雞， 不過就無講啲油點算，我諗應該有得拆個底盤出黎洗掛。

「KFConsole」暫時未有實際發售日，敬請期待後續消息。