【遊戲介紹】真正煉金術士模擬器 《藥水工藝》溝藥試藥採藥賣藥一腳踢

遊戲加上「煉金術士」多數玩家都會第一時間諗起《鍊金工房系列》,不過今次介紹嘅《藥水工藝》(Potion Craft: Alchemist Simulator)煉金術士模擬器就更為純粹,真係齋玩整藥同賣藥嘅流程,相對地合成方式、混合藥草嘅種類就更廣,想真正試下做煉金術士的話,機會黎啦!

 

 

《藥水工藝》(Potion Craft: Alchemist Simulator)由獨立工作室 Niceplay Games 開發,類型係沙盒工藝模擬器。遊戲中玩家需要利用各種工具同原料進行「等價交換」,合成為各種藥水,既要顧及生產藥水嘅數量,仲要不停開發新配方,去滿足城市中各人需求。

 

 

要做藥首先要有草藥,得到嘅方式可以用高價同商人購買(可講價),又或者自己種都得。有原料之後就要準備合成,不論係葉、花、果實、礦物質等都需要研磨成末以作混合,然後就要喺大鍋中混合材料。混合途中玩家需要不時添加水、油等物品,再控制各工具嘅溫度、狀態,因應合成嘅過程會出現不同嘅產物,所以組合列表應該極之豐富,溝一支飲完會中毒嘅補血藥不是夢!

 

 

當整好各式各樣藥水之後,就可以賣俾上門尋找解決問題嘅客戶,不但可控制藥水賣價,仲會因應具體售後情況出現不同結果,有機會結識公會,又或者得罪知名人物,最後甚至可以決定整個城鎮嘅命運。

 

 

《藥水工藝》(Potion Craft: Alchemist Simulator)預計於 2021 年推出,已於 PC Steam 上架,可先收藏至 Wishlist。

 

五木

五木 動漫電玩宅,極愛金田一系列,擅長動作及策略遊戲

追蹤

更多文章