上年我哋介紹過一隻生存恐怖遊戲《Sons of the Forest》，經過一年之後終於有新片發表，片中不但有遊玩畫面展示，仲有埋推出日期，預計於 2021 年推出，令人非常期待！

由加拿大獨立遊戲開發商 Endnight Games 製作，《Sons Of The Forest》係 2018 年推出嘅《The Forest》續集，係一款開放世界生存恐怖遊戲，採用第一身視點。玩家要喺森林中探索，搜尋資源建造避難所，同時又要採集食物維持生命，亦可以選擇種田確保食物來源，當然唔少得生火取暖。

墜機後靠 GPS 搵路

搜尋資源建造避難所、生火

玩家身處嘅不知名森林，棲息住一群具有攻擊性嘅異變怪人，而且造型都幾得人驚。另外根據上集表現，故事劇情應該都有返咁上下，主線應該都係要玩家深入島嶼深處尋找離開嘅線索，不過就未知同上集嘅關係，而多人合作遊玩會唔會喺今集出現就仍未公佈，期待更進一步資訊。

呢隻野都幾核突

《Sons of the Forest》預計於 2021 年上市，對應平台為 PS4 及 PC。