【讀者投稿】2021《星戰》LEGO冇新意?!睇埋Disney Plus助攻你就知係寶

星球大戰 LEGO 每年 1 月都會出新產品,對佢會出啲咩新野都有一定嘅期待。繼 2020 年出完 501 軍團盒兵,我總希望可以更多星戰前傳複製兵 (Clone Trooper) 嘅盒兵或相關嘅戰機。 但由 11 月中嘅消息傳聞,到正式見到官圖,換來嘅只係失望。1 月只有 4 盒新星戰 set,除左其中一盒叫特別少少外,其他 3 盒都係翻炒舊機。同時,都冇左過去 $15 美金 4 隻人仔嘅盒兵,對玩開星戰兵黎講,是最失望呀~

 

一月 LEGO Star Wars 產品

漫達洛人 75299 Trouble on Tatooine – 276 件

$30 美金(約 $240 港幣),今個 wave 最有睇頭嘅一盒,Mandalorian 電視劇第二季嘅內容。

 

 

衣盒有 3 隻人仔,2 座建築物同一架 speeder。
先講人仔,有 3 隻人仔,分別係 Baby Yoda (the Child,第二季講左佢個名,但唔開估啦)、沙人(sand people)同埋漫達洛人主角 (Mando)。頭個兩隻出過呀啦,俾機會你平入 Baby Yoda,最重點係隻漫達洛人,因為佢個絲印係新 busker 甲(第一季有提到由來),更有手臂 print 。以 $30 美金黎講,算唔錯呀!
Speeder 都算係有別於過去砌法,可以坐隻 Mando 同 Baby Yoda。
之後兩座建築物,沙人嘅半座營地,普通場景可以放入同其他沙地 set 到玩,特別係同 Mos Eisley 酒吧一齊玩。 最後就係外型唔錯嘅座地弩炮,幾型。玩城堡的朋友都可以參考下。2021 年必入 set,因為平價有曬兩隻主角人仔同不過不失嘅建築。

千歲鷹 75295 Micro Fighter – 101 件

$10 美金(約 $80 港幣)


今年已經出到第 3 架啦,過去出過 2014 年 75030 同 2018 年 75193。人仔係新版 Han Solo,過去係 75159 死星,75205 2018 年 Mos Eisley 餐廳同 75290 2020 年 Mos Eisley 餐廳出過,如果冇買過個 3 盒野,衣盒野就係平價入手隻人仔啦。
相信會買衣盒嘅玩家,都係 miss 左舊個兩架,咁就唔洗食炒價。如果有舊個兩架同埋隻 Han Solo,就唔洗特別去買衣盒啦。

 

平價版 75300 TIE Fighter – 432件

$40 美金(約 $320 港幣)

 

翻炒左好多次嘅 TIE Fighter(平價版)。上次架 Solo 電影 TIE Fighter 75211 賣 $70 美金,今次只係 $40 美金。對於玩左一陣或好耐嘅玩家黎講,真係冇咩原因要買啦。不過,佢都有佢嘅賣點,之少我會考慮買多幾盒。

先講下人仔,3隻人仔,好例牌咁俾 TIE Pilot (鈦戰機機司)、Imperial Stormtrooper (帝國軍暴風兵)同黑色 Droid – NI-L8,隻 Droid 係全新,所以儲人仔款就要追埋佢啦。衣隻暴風兵係用左 2019 出嘅兩層組裝頭盔款式,岩岩出嘅聖誕日曆都有一隻。人仔上算正常,只係冇嘅特出角色。
架機的確細架左,但件數唔算細左好多,外型都保持左應有嘅感覺。裡面坐到人仔,個頂都有一粒印件,算係咁。
新意及創意上係零,但可能佢就食正個岩時間出。2020 出個隻星戰遊戲 Star Wars Squadrons 就集中玩戰機對戰,想玩戰機場景嘅朋友,可以用平價,買 2-3 架組返個Squadron 去砌機庫或對戰場面。連漫達洛人套劇都再見返 TIE Fighter,所以都吸引到部份玩家去買。對於玩開軍隊嘅我,我都想買返幾架黎玩場景同組織小隊,因為成本平左。價錢平左,入門門檻就低左,對於新手想玩星戰 Lego 係唔錯經典機嘅選擇。但對於已經有舊版 TIE Fighter 的朋友,就可以skip 左佢啦,除非你想玩戰機場景或機庫景。

平價版 75301 X-Wing – 474 件

$50 美金(約$400港幣)

 

基本上有星戰嘅地方就一定有 X-Wing 的影子。衣架係 Luke Skywalker 個架 Red Five T-65B X-Wing 機,2018 年出過架大版 75218 $80 美金。2021 年個架係 $50 美金,平價入門嘅 X-Wing。基本上同 TIE Fighter 一樣啦,X-Wing 出過好多次, 2015 年到而架 Resistance X-Wing 都出過 3 架。改下色,改下件又出架新,LEGO都幾懶。

不過,平價版就打開左「買幾架」 的可能性。因為係近期電視劇同遊戲中,都見到有多過一架嘅 X-Wing ,所以都會吸引到玩家買多幾盒。
先講下人仔,例牌跟3隻常見人仔,Luke Skywalker、Leia 公主同 R2-D2。今次有一隻新反抗軍將軍,Jan Dodonna,成為左一大賣點。 隻 Skywalker 同之前出過嘅差唔多,不過用返左舊版頭盔,以唔係 2018 X-Wing 隻 Luke 個頭盔。2018 年隻 Luke 個頭盔係新款,不過搞到個比例唔岩,所以推斷出點解今次用返舊版頭盔。

Leah 公主係同 2019 年出架 Tantive IV 一樣,只係冇左個白色腳件去換。
General Jan Dodonna 反抗軍將軍曾經為電影前傳嘅共和國效力,之後再為帝國軍效力,最後改邪歸正為反抗軍效力。動畫同電影都會見過佢指揮,電影第四集攻打第一粒死星嘅戰術都係由 Jan Dodonna 策劃。人仔係第一次出,髮型配合臉上嘅鬍鬚,身上嘅絲印最正係有反抗軍軍階,細節上算唔錯。

返到去架機到,全架機係細左,但整體上都做得好足。今次最大唔同係對翼個機關唔同左,冇用到像膠圈係機翼位,而係用複雜嘅 Technic 砌出黎,外觀上差小小,但就唔洗用到膠圈同埋對翼易開咗。

 



 

雖然鬧就一定會呀啦,但睇到 2020 年第 4 季嘅星戰遊戲同星戰 Mandalorian(漫達洛人)電視劇,我有開始理解點解 LEGO 會咁出產品。

迪士尼買左星戰後,2015-2019 嘅 3 套主線電影(天行者故事)劣評如潮,都係星戰俠盜一號 (Rogue One) 叫好返小小。
直到星戰複製戰記 (Clone Wars) 第 7 季,及近期嘅 Mandalorian 電視劇,開始令星戰變得好睇同有趣。過去幾年出嘅 3 隻大星戰遊戲,Star Wars Battlefront 2、Star Wars Jedi: the Fallen Order 和 Star Wars Squadron,3 隻遊戲取材都係星戰電影 1-6 集同第 6 集之後嘅故事。


再加上 Disney Plus 岩岩公佈大量新星戰電視劇同電影都係圍繞著帝國軍時期同第 6 集之後。
我可以肯定未來迪士尼同 LEGO 產品主題將會集中係帝國軍初期到末期,即「前傳第3集後的20年」到「正傳第3集之後的5-10年」(未到第7-9集電影的時期)。以上大量背景,我就明白點解要出返 X-Wing 同 TIE Fighter 平價版。

 

總結,今年年頭少有地得 4 盒新 set,可能因為 2020 年的 summer wave 去到 8-9 月先有,唔想咁快就出咁多。正如開頭時講左星戰故事未來發展,所以我對重出 X-Wing同 TIE Figure 未至於一面倒嘅負面評價。睇完新劇 Mandalorian 第2季,會更加想買返 Red Five 同架 TIE Figther 玩。價格下調令入場門檻低左,都應該會吸引都新舊玩家去買。
個人以言,主力玩兵同反抗軍(或新共和國軍)戰機,平價版嘅 X-Wing,有一定吸引力,因為可以買多幾架砌場景,又可以玩換色等。

VJGamer 歡迎讀者投稿 – 如蒙投稿,請將文稿、筆名、作者簡介及聯絡電話,電郵至 [email protected]

 

Bruce Bswift

Bruce Bswift Swifties, skater, bboy, AFOL (adult fans of Lego), Jedi.

追蹤

Facebook 更多文章 網站