【遊戲介紹】八人合作屍海求生 《No More Room In Hell 2》符合現實求生環境的喪屍遊戲

喺 2011 年推出嘅《No More Room In Hell》雖然唔係咩爆紅作品,但因為遊戲免費同埋可多人合作關係,成功吸引到為數不少嘅玩家。相隔接近十年,續集《No More Room In Hell 2》早前終於喺 Steam 上架,仲支援八人連線添!

 

 

《No More Room In Hell 2》由 Level Games 製作,係一款多人線上生存動作遊戲,採用第一身視點,Unreal 4 引擎。故事講述一種新型病毒肆虐,然後科學家就整咗種疫苗,點知打完啲人變得對人肉有無限渴求,於是主角一行人就要喺呢個環境下努力求生。

 

 

《No More Room In Hell 2》最特別嘅地方係最大支援八人連線合作(請注意遊戲並無單人模式),而喺遊戲開始後玩家係唔會有任何裝備及武器。玩家要一邊應付一波一波來襲嘅喪屍(不存在特殊感染者),同時要周圍探索地圖搜集資源。最正嘅係彈藥係有限資源,唔會好似《Left 4 Dead》、《World War Z》咁任射,八位玩家要互相 Cover。另外每次開場地圖都會係隨機放置物品,就算係同一張地圖都會有新鮮感。

 

 

另外根據早前嘅消息,《No More Room In Hell 2》唔再採用免費制,取而代之嘅就係一次性付費制,但就唔會有額外付費 DLC,會以持續更新形式營運。遊戲現時已喺 Steam 上進行搶先體驗,內容上主要功能已大致完成,並提供三個模式供遊玩。之後嘅一年時間就會主力增加武器、排名、改善喪屍 AI、增加地圖及 PvP 模式等等,亦會加入前作所欠缺嘅人類 NPC、製作系統等等。

 

 

五木

動漫電玩宅,極愛金田一系列,擅長動作及策略遊戲

追蹤

更多文章