最近呢個星期有單傳言鬧得熱哄哄，就係本身只要用 $10 就可以享有最多長達三年嘅微軟超抵玩月費式服務「Xbox Game Pass Ultimate」，即將喺 1 月 25 整式取消呢個服務。我地就呢件事向香港微軟求證，得到嘅答覆係「啱一半啦」。

「Xbox Game Pass Ultimate」簡單講你可以當佢係超級遊戲庫，只要加入「Xbox Game Pass Ultimate」資格就可以無限制使用微軟提供嘅遊戲庫，而呢個遊戲庫每個月都會新增多隻遊戲入去，最重要嘅係加入嘅遊戲並唔係幾年前又或者無人要啲倉底貨，基本上該月新作多數都有份，好似《Wasteland 3》、《Medium》呢啲大作都會一出即落遊戲庫，而且最低只要加 $10 港紙就可以擁有三年資格，非常抵玩。

不過最近就有傳 $10「Xbox Game Pass Ultimate」就黎無得 Join，喺手機版登入亦都會見到服務優惠將於 1 月 25 日完結。我地就相關事項向微軟查詢，佢地回覆 $10「Xbox Game Pass Ultimate」的確係會係短期完結，不過完結嘅係首次登記 $10 三個月試玩優惠，但係以 $10 升級至「Xbox Game Pass Ultimate」資格呢樣野仍然存在，但係佢地都有補充 $10 蚊升級呢樣野都係會有完嘅一日，不過佢哋就收唔到通知短期內會完結，加上黎緊先開始有第一隻 Xbox Series X|S 大作《Medium》落 Game Pass，所以都唔會咁快完，但都要睇返總公司決定 。

取消嘅只係首次登記 $10 三個月試玩優惠

亦即係我地之前教落，先買盡 36 個月金會員，再用 $10 蚊買「Xbox Game Pass ULTIMATE」兌換呢個方式仍然係最抵玩。要注意如果本身已經有金會員資格，「Xbox Game Pass ULTIMATE」係會由你買果刻開始計，所以買前務必確保自己最少有 36 個月金會員資格。另外，香港微軟有提及咁 1年 Xbox Live 短期內將會下架（Microsoft Online Store），想 Upgrade 嘅朋友要快啲入手啦。（XGPU 介紹）