早排推出恐怖遊戲嘅《父礙》（Remothered: Tormented Fathers）評價不俗，開發佢嘅 Stormind Games 自然受到玩家關注，日前佢地就宣佈新作《Batora：Lost Haven》消息，今次唔玩恐怖轉玩動作遊戲，並且有埋宣傳片俾大家先睹為快。

《Batora：Lost Haven》係一款動作角色扮演遊戲，採用俯視角度。遊戲中地球因不明事件被毀滅，主角 Avril 雖然失去自己家園但同時得到強大嘅力量，為咗尋求令地球復活嘅方法，於事展開宇宙之旅，前往各大星球探秘。喺旅程中玩家會遇上各種人，選擇幫助定同佢地對抗、運用智慧或力量解決事件，全部可由玩家決定，當然亦會影響之後嘅劇情，話晒有曾經手《巫師》、《HORIZON ZERO DAWN》遊戲劇本嘅 Anne Toole 幫手，值得期待嘅。

戰鬥方面，會有近戰劍、遠攻射擊兩種玩法，透過切換物理模式（劍）與精神模式（槍）進行戰鬥，玩家要因應敵人特性隨時切換模式。喺不同模式下玩家不但攻擊模式改變，技能亦有所不同，而且會有獨立嘅生命值，任意一方歸零就會死亡，呢點係套用返現實不論物理定精神受致命傷=死亡嘅情況，頗為獨特。

《Batora：Lost Haven》推出時間未定，對應平台為 Xbox Series X|S、Xbox One、PS5、PS4、Nintendo Switch、PC Steam。