【遊戲介紹】極靚美術冒險遊戲 《黃昏沉眠街》少女與貓的東方幻想世界歷險記

今次介紹嘅遊戲《黃昏沉眠街》(黄昏ニ眠ル街)非常特別,係由日本插畫家 Nocras 領軍開發(曾參與《三國志大戰》),佢嘅作品充滿東方味道,而遊戲釋出嘅美術設定圖亦都令人驚豔。最近終於有免費試玩版上架,並預計於今年春季發售。

2021.04.07 更新:遊戲已公佈發售日為 2021 年 4 月 14 日。

 

 

《黃昏沉眠街》由 Orbital Express 開發,係一款高自由度高 3D 探索冒險遊戲,採用第三身視點。遊戲故事講述女主角悠雲喺乘坐飛艇旅行中途,因為飛艇發生故障而降落於神秘城市。為咗收集零件修理飛艇,喺呢個被濃霧覆蓋嘅城市中探索後,發現城中全無人類氣息,有嘅就只係鎮上嘅謎之貓。呢度到底發生咩事?就等玩家去解開啦。

 

 

前面提到本作係由日本插畫家 Nocras 領軍開發,佢係由 3D 設計師轉為自由開發者。有趣嘅係本作嘅世界觀其實源自佢舊有嘅作品,遠在 2013 年已經見到類似嘅插圖設定,可以話本作係經多年構思而成。

 

 

喺今次開放嘅試玩版,玩家主要係探索小鎮欣賞景色,大約費時 15 分鐘。有興趣作進一步了解的話,聽日上午九時會有個直播活動,屆時開發者 nocras 會親自現場遊玩試玩版並與玩家進行交流。《黃昏沉眠街》(黄昏ニ眠ル街)預計於 2021 年春季發售,對應平台為 PC Steam。

2021.04.07 更新:遊戲已公佈發售日為 2021 年 4 月 14 日。

 

 

五木

動漫電玩宅,極愛金田一系列,擅長動作及策略遊戲

追蹤

更多文章