【遊戲介紹】超自由迷宮探索打寶 《The Slormancer》重甲法師魔法騎士任你自由配搭

刷寶類遊戲好多時都係講求一個「爽」字,今次介紹嘅遊戲《The Slormancer》不但玩起上黎夠「爽」,而且玩法仲超級自由,想做著重裝嘅魔法師又得,想做射魔法嘅騎士又得,加上之前放出黎嘅試玩版得到玩家嘅一致好評,屬四月超值得入手之作!

 

 

《The Slormancer》由 Slormite Studios 開發,係一款迷宮探索動作角色扮演遊戲。遊戲講述邪惡神秘嘅「Slormancer」與及一眾怪物手下企圖再次征服世界,玩家身為王國最後嘅希望挺身而戰。玩家可以選擇從騎士、獵人、魔法師中揀選一個作為職業,並運用各自獨特嘅能力,於七種不同類型以及隨機自動生成嘅迷宮入面挑戰各大頭目。

 

 

遊戲基本玩法都係入迷宮殺怪、刷寶、強化技能為主,現時已知會有超過 40 種怪物及頭目。刷寶方面,淨係裝備已經有 120 種,而且仲會分為普通、魔法、稀有、史詩四種稀有度,另外仲會有 80 多種獨特詞綴,可以話係極難刷到一樣嘅裝備。另外刷到特殊道具的話,仲可以幫裝備重新鍛造升級,無限地升級戰力。

 

 

裝備之外,三個職業都有自己獨有技能樹,都係透過強化升級解鎖,總計有超過 150 種元素相關及被動技能。有強大嘅火魔法、凍結敵人冰魔法、召喚雷霆並製造巨大風暴、擁抱光之力或與暗影合一等等。最正嘅係裝備道具技能都有極高自由度,玩家用魔法師可以著重甲做坦,騎士可以專精魔法玩遠攻,獵人可以玩近戰,育成方式完全任由玩家取決,再加上刷寶及隨機地城,可以話每次玩都有新體驗!

 

 

《The Slormancer》預計於 4 月進行搶先體驗,對應平台為 PC Steam / GOG。

 

五木

動漫電玩宅,極愛金田一系列,擅長動作及策略遊戲

追蹤

更多文章