【遊戲介紹】卡通風格動作遊戲 《Raidborn》探索動態生成幻想大陸

今次為大家介紹嘅係一款由德國獨立團隊 Phodex Games 製作嘅遊戲《Raidborn》,官方以「低像真度」美術配合高度武器反饋呢種反差為賣點,暫時預計會喺今年年尾推出搶先試玩體驗版。

 

 

《Raidborn》係一款動作角色扮演遊戲,採用第一身視點,動態生成地圖及任務,並以類似《Sea of Thief》嘅低像真度美術風格表達。遊戲故事講述玩家係皇家護衛隊嘅一員,但係有一日國王被暗殺,問責時主角受到免職流放。呢個時候,大地出現魔法水晶,令到周圍嘅生物異變,於是主角就決定挺身抵抗拯救世界順便洗刷自己污名。

 

 

遊戲標榜著重戰鬥表現及技巧,特別係揮動單手劍、雙手劍、戰斧等近接武器,又或者使用弓箭等遠程武器時,玩家會感受到武器重量所帶來嘅反饋,而受到攻擊嘅敵人亦會有精確嘅物理表現,藉著各種反饋為玩家帶來巨大嘅打擊快感。不過喺影片中展示嘅戰鬥畫面感覺上並非官方所講得咁強大,擋格刀劍時亦唔似有附加相應嘅「重量」,未知是否仍在開發中嘅原故。

 

 

另外遊戲中亦加入常見嘅技能系統,透過學集不同技能令角色有多種培育方法。依據技能及點數分配,可以將角色培育成快速敏捷嘅劍士、以力取勝嘅蠻族、穿著重甲以高防禦力見稱嘅騎士等等,加上各種戰利品道具裝備,動物同伴等等,之後仲會追加可升級嘅「玩家之家」,不過仲未知有咩用。

 

 

《Raidborn》預計於 2021 年下半年推出搶先體驗,對應平台為 PC Steam。

 

五木

動漫電玩宅,極愛金田一系列,擅長動作及策略遊戲

追蹤

更多文章