【遊戲介紹】中世紀砍殺類新作 《Chivalry 2》大規模對陣冷兵器戰場上互劈

中世紀砍殺類遊戲本身最喜愛嘅就係《騎馬與砍殺》(Mount & Blade),不過二代因為要受中國式審查嘅關係,我就不了,好在出色嘅同類遊戲唔係得佢一隻。今次介紹嘅《Chivalry 2》係 2012 年推出嘅《Chivalry: Medieval Warfare》續集,而且上集到現時仲係「極度好評」評價,想試續集的話最快等多個星期就有得玩了。

 

 

《Chivalry 2》由 Torn Banner Studios 開發,係一款多人攻城砍殺遊戲,採用第一身視點(跟第一代的話就有得喺遊戲中自由設定第一 / 第三身視點),最大支援 64 人大混戰。遊戲基本玩法係於戰場上與敵軍展開攻城戰,與隊友衝鋒陷陣。本系列最特別嘅地方係戰場上除咗有投石車、衝車等攻城武器外,場上嘅物品例如掉落嘅車輪甚至係雞都可以用黎做武器,加上可以掠奪村莊屠殺農民,真係極有戰爭味。

 

 

喺介紹影片所見,本作基本上繼承前作特色,如職業系統。玩家需由四種職業中一個,各職有自己相應定位。使用遠程攻擊嘅射手,可以裝備弓箭或標槍等遠程武器;全職速度最快嘅劍士,可使用劍、鎚等單手武器,同時可裝備盾牌;極高攻嘅前鋒,使用長柄武器或巨劍,可以使用特殊技能衝鋒;坦職騎士,使用長劍或戰斧,可裝備巨盾。每個職業玩法、走位都不盡相同,加上要考慮與隊友配合,玩上手就知道唔簡單(雖然大多數時間都係走散晒……)。

 

 

今集除咗畫面表現更靚,更多招式之外,最大改進就係打擊感,劈人、擋架終於有返啲「重量」。另外新增「馬匹坐騎系統」,,不過官方就話要多啲時間調整,會喺遊戲推出之後嘅更新加入,暫時仲未知點玩。

 

 

遊戲除咗 PC 版,仲會同步於家用機推出,並且支援跨平台遊玩。主機版本支援 [email protected]、光追(30fps),同時支援 PS5 DualSense 拉弓壓力觸覺回饋功能。購買 PS4、Xbox One 嘅玩家亦會免費獲得 PS5 及 Xbox Series X|S 升級更新,現時預購的話不論係 PC 定家用機都可以參加 4 月 23 日早上 10 點半(美國東部時間)至 4 月 26 日晚上 10 點半嘅封測,在同時仲會有把雙手劍贈送。

《Chivalry 2》預定於 6 月 8 日正式發售,對應平台為 Xbox One、Xbox Series X|S、PS5、PS4、PC Epic Games Store(一年獨佔),支援繁體中文。

五木

五木 動漫電玩宅,極愛金田一系列,擅長動作及策略遊戲

追蹤

更多文章