【遊戲新聞】多間遊戲公司意圖收購?Square Enix 目前企硬「無打算賣公司」

 

外國具公信力媒體 Bloomberg(彭博)於 2021 年 4 月 16 日報導,位於東京嘅著名遊戲公司 Square Enix,獲得至少兩間公司於投資方面嘅興趣,更一度傳出 Square Enix 將會被收購嘅消息。

是次消息來源引用自美國投資網站 CTFN,消息一出,Square Enix 股價立刻上升 12%,係過去八個月以來首次獲得如此大型升幅。不過,Square Enix 同日已經馬上發出聲明,表示目前並無收到任何第三方公司提出嘅收購方案,而自己亦無打算要分拆公司業務或者出售公司。

 

 

空穴來風,未必無因;CTFN 引用兩位銀行家嘅消息,表示有公司想投資到 Square Enix 呢件事只係處於初步構想階段,所以 SE 未收到任何企劃書亦都係意料中事。雖然新聞未無指出投資者嘅身份,不過剛剛收購 Bethesda 嘅 Microsoft、於 SE 合作緊密嘅 Sony 甚至不斷入股到各工作室嘅中國騰訊,都好有可能係今次事件嘅主角。

雖然 Square Enix 目前矢言表示「唔打算比人收購」,不過市場向錢看,到底日後發展如何,有新消息會再為大家報導。

 

神婆

為咗兩隻貓嘅生活努力奮鬥,日系遊戲及 RPG 專攻,重度聲優控。

追蹤

Facebook 更多文章