【遊戲介紹】扮演戰亂中的平民 《Siege Survival: Gloria Victis》支援前線士兵守護城池

一般黎講中世紀戰爭類遊戲玩家唔係扮演士兵就係做指揮果個,主要場景都係戰場上面,但有無諗過扮演戰場後方嘅平民又係咩玩法?由獨立工作室 Fish Tank Studio 製作嘅《Siege Survival: Gloria Victis》就係要玩家扮演戰亂期間嘅平民,如何求生,如何協力守護家園,題材非常特別。

 

 

《Siege Survival: Gloria Victis》係一款中世紀策略生存遊戲,之前出過免費序章仲得到「極度好評」評價。遊戲背景設定於中世紀嘅「Gloria Victis」世界,敵人步步進逼不停攻打我方嘅堡壘,而我方節節敗退並已經退到最後一座城池,已經無路可逃。玩家扮演嘅係一位工人,為咗保命保家園,必需為前方士兵提供各種所需物資,直到援軍抵達。

 

身為平民嘅玩家,要做嘅工作可以話係超乎想像。遊戲一開始因為被敵軍用投石車攻擊完,城內一片狼籍,先製作篝火及搜集食材為其他平民提供熱食,然後就要想辦法搵清潔飲用水同修復水井,再製作床舖為疲累受傷嘅人提供休息嘅地方等等。同時士兵又希望你哋可以幫手尋找有用嘅資源幫助前線,例如箭、盔甲等物資,而呢啲只不過係日間嘅工作一部份。

 

 

進入夜晚,玩家可以由秘密通道出去被敵軍佔領嘅地方,邊避開巡邏中嘅敵軍邊搵有用資源。因為我地係偷偷地出城嘅關係,所以移動速度會比平常慢,雙點滑鼠就可以奔跑但就會發出聲音,增加被發現嘅風險,加上我地只係平民,唔好諗住打得贏士兵。拾荒過程中背包空間有限,你無法帶回所有搵到嘅物資,必需作出取捨,同時有機會遇上事件,例如目睹丈夫死去嘅老太太,你可以選擇幫佢埋葬又或者搶走屍體上嘅斧頭再逃跑。

 

 

工作以外,玩家仲要滿足角色嘅生存所需,呢啲數值包括疲勞、飢餓、口渴、傷害、疾病及情緒。當無法滿足正常狀態,會逐漸惡化,工作效率明顯降低。持續的話不但角色會死亡,仲會令到工作延誤導致保壘修復變慢,真正累全家。

《Siege Survival: Gloria Victis》預計於 2021 年第二季上市,對應平台為 PC Steam。

 

五木

五木 動漫電玩宅,極愛金田一系列,擅長動作及策略遊戲

追蹤

更多文章