【遊戲介紹】萬人同場大亂鬥 《Scavengers》末日凍土 PvPvE 多人生存遊戲

之前我地有介紹過嘅《Scavengers》,本身就主打大逃殺+生存遊戲玩法,但最正嘅係佢地係想令遊戲可以容納極多人同場亂鬥。之前就講過內部測試過千人玩都無問題,最新嘅承諾係會推出可容納超過九千人嘅地圖,真正實行萬人大亂鬥!

 

 

《Scavengers》由 Midwinter Entertainment 製作,係一款結合 PvP 同 PvE 嘅多人生存競技遊戲,採用第三身視點。背景講述未來因為月球被破壞,散落嘅碎片令地球變成一片凍土,倖存嘅人類雖然已經前往太空站生活,但資源始終有限,而喺地上走唔切嘅人就染上新型恐怖病毒「Scourge」,中咗呢種病毒嘅人會變成兇殘暴力嘅變種生物。為咗尋找資源及補給品,太空站 AI「Mother」 會定期發射太空艙落地球,並搵出消滅「Scourge」嘅線索,而玩家所扮演降落到地球嘅「拾荒者」,就要喺末日凍土上同其他人類、生物展開對抗。

 

 

玩家將以四人一組為單位,有坦、DPS 等職業之分,當然職業間都會有專屬技能。同一般大逃殺遊戲唔同,雖然同樣有 PvP 元素,但因位要兼顧角色嘅「溫飽值」,例如要生火取暖咁;角色亦有「肌餓感」,需要狩獵以維持生命,所以有時玩家需要共同努力先會得到最大效益。另外大逃殺遊戲常見嘅「縮圈」,呢隻遊戲入面會改為喺地圖周邊產生動態事件。例如會有狂風逼你向某方向前進;某地區會有肌餓異變生物暴走等等,隨時會有新事件出現,迫使你作出幫助定阻礙其他隊伍定嘅決定。

 

 

 

由於本作最終目標係得到足夠嘅資源同埋生存,所以鎖定有威脅性嘅敵隊仍然有必要性。有趣嘅係殺人唔一定要自己郁手,玩家可以利用積雪追踪敵方玩家,引野生動物或者變異怪物送俾佢地;又或者趁暴風雪掩護時偷偷地潛入庇護所搜刮等等,利用環境黎戰鬥將會係呢隻遊戲最大嘅特點。另外根據開發團隊所講,未來會推出新角色、新敵人、新目標、新模式、新地圖等等,當中包括使用「ScavLab」實驗模式測試可容納超過九千人嘅大型地圖。

 

 

《Scavengers》目前喺 Steam 同 Epic 都做緊搶先體驗,之後仲會推出 PS4 及 Xbox One 版本,有興趣嘅朋友建議試下 PC 版本先,玩住等家用機。

五木

五木 動漫電玩宅,極愛金田一系列,擅長動作及策略遊戲

追蹤

更多文章