【試玩感想】故事吸引惟射擊感表現一般《Returnal 死亡回歸》兼具難度與神祕感非常耐玩

 

PS5 獨佔遊戲《Returnal 死亡循環》已於 2021 年 4 月30 日上架,呢隻由芬蘭工作室 Housemarque 開發嘅作品於各方面表現良好,作為工作室首隻 3A 作品黎講絕對叫人收貨,當然遊戲仍然有可以改善嘅空間,以下係編輯部嘅無劇透試玩感想。

《Returnal》係一隻第三視點 Rougelite 射擊遊戲,玩家飾演 ASTRA 公司嘅宇宙探索員 Selene Vassos,為左追尋「白影」嘅訊號,而來到故事發生嘅星球。你所駕駛嘅穿梭機不幸墜落於星球之上,後無退路嘅情況下,你惟有不斷於星球上開始探索。呢個係一個奇妙嘅星球,除左有大量疑似希臘石像嘅失落文明,亦滿佈各類型外星怪物。

 

 

遊戲嘅 Rougelite 設定令到作品有極高耐玩性。玩家每次死亡之後就會於隨機地區重生,然後視乎玩家能力,睇下你可以於每一次「生命」裡面可以探索到幾遠。每次探索中,玩家都有機會獲得暫時道具或者永久道具,包括強化身上太空衣嘅能力、或者係更強大嘅槍械,部份道具會於隨住你嘅死亡而失去。

玩家亦會在路途上發現一啲已死亡嘅同事,喺佢地身上收集類似殘影設定嘅音訊,去了解佢地臨死前發生過乜野事,從而對呢個星球有更進一步了解。

 

 

玩家每次都會隨機出現於某個區域當中,但係你於過去每一次輪迴當中曾經去過嘅地區,亦有可能因為推進探索而連結在一起。過程中亦會發現唔少區域或者大門係需要靠「鎖匙」或者特定能力先能夠開啟;亦會有區域裡面係擺放住與故事主線有關嘅設備。

以工作室首隻 3A 遊戲黎講,《Returnal》表現良好,算係頗能夠善用次世代主機嘅畫面機能,無論係音效、畫面、光影等等部份,都做得相當唔錯;係主角個樣唔吸引人物皮膚模組做得略為生硬,同埋有時重生完之後,唔知點解會變成短暫嘅第一視點操作(?),呢啲部份都令人有少少不解。

 

 

遊戲耐玩度係極高,但係,由於敵人難度高,主角相對薄血,而戰鬥系統中嘅閃避系統,面對敵人嘅連串「光球」攻擊時,其實發揮唔到乜野作用,大多時候都係利用自動門開關嘅設定、或者匿喺柱後面進行拖拉打法。

所以,玩家每次可以探索到嘅區域、以及收集到嘅線索,都頗為有限,如果想了解遊戲全貌,真係唔知要玩到何年何月;而遊戲場景主要分別係高低差以及走位上嘅分別,但係陳設較為類似,所以耐玩度雖然高,但係同時亦可能容易令玩家失去耐性(我目前攻略咗遊戲兩日,故事全貌應該睇左十分一都無,還需要繼續努力!)

 

 

同時,作為一隻射擊遊戲,《Returnal》喺射擊感方面表現較為遜色。遊戲非常善用 PS5 DualShock 嘅震動功能,但係《Returnal》裡面好多動作都係「係唔係都震左先」,所以編輯部於攻略時有時會陷入兩難:開住震動,好快會雙手發麻;熄咗震動,又會體驗唔到好多射擊感等等嘅感受,偏偏《Returnal》係一隻需要長時間攻略嘅遊戲!

假如工作室如早前報導所講,會加入手動儲存功能,對於玩家黎講或者都係多左一個休息嘅機會(PS5 掛機嘅話唔係唔得,但記得預先熄左自動更新功能)。

 

 

不過,整體黎講,《Returnal》作為目前少數登錄於 PS5 嘅獨佔作品,表現算係相當唔錯了,假如你有幸買到 PS5,呢隻《Returnal》都係值得玩家一試嘅遊戲黎。

編輯部評分:7/10

 

 

神婆

神婆 為咗兩隻貓嘅生活努力奮鬥,日系遊戲及 RPG 專攻,重度聲優控。

追蹤

Facebook 更多文章