一般黎講音樂遊戲嘅難度都係同鍵嘅數目以及密度掛勾，但係有無諗過就算只得一個按鍵，無複雜嘅譜都可以好難玩？《節奏醫生》（Rhythm Doctor）就係一款只有一個按鍵但係會令你玩到手忙腳亂嘅音樂遊戲，而且自推出後一直得到「壓倒性好評 」評價，絕對係一隻好遊戲！

《節奏醫生》由獨立團隊 7th Beat Games 製作，係一款音樂節奏遊戲。遊戲中玩家喺一間非常特別嘅醫院任職，呢間醫院以全新嘅療法為醫治心臟，方法就喺聆聽病人心跳嘅節拍，並喺第七拍時準確地按下空白鍵，基本玩法就係咁簡單。

由於病人有各種症狀，所以心跳節拍亦都不一，甚至會有不規則嘅變化。雖然只有一個按鍵，但係除咗基本節奏變化外，仲會有長按指令，加上遊戲中會出現大量干擾，例如突然出現大量訊息、雜訊、音樂卡住等等外在因素，影響對節拍嘅判斷，要準確地喺第七拍按鍵並不簡單。因為上面嘅原因，如果只係專注於畫面的話就肯定玩到手忙腳亂。

遊戲玩法過癮，音樂部份亦都做好認真，歌曲動聽之外亦都好配合到故事。另外每位患者有自己嘅背景設定，有以「牽掛」為主題嘅歌曲、亦有描寫兩小無猜嘅愛情，類似嘅關卡有超過 20 關，絕對無 Hea 玩家，而且遊戲內置關卡編輯器，玩家可自行創作關卡+音樂，亦可以喺 Steam 工作坊下載其他玩家嘅創作，長玩長有！

另外除咗單人模式外，仲支援單機雙人遊玩，亦可以透過 Steam 遠端邀請無買遊戲嘅朋友共同遊玩，但係目前雙人模式並未完善，要等之後更新改善。

《節奏醫生》（Rhythm Doctor）已經推出，對應平台為 PC Steam，支援繁體中文。