【遊戲介紹】廢老求生大冒險 《Just Die Already》爭奪入護老院資格大開殺戒

廢老呢樣野世界各地都有(香港盛產無腦果隻),而且仲好乞人憎添。黎緊有款遊戲《Just Die Already》就講喺未來無人再俾錢供養廢老,佢哋要靠自己打生打死爭奪入護老院資格,齋睇設定已經覺得吸引,仲要有多人連線,可以一試!

 

 

《Just Die Already》由 DoubleMoose 開發(曾製作《Goat Simulator》設計師 Armin Ibrisagic 創立),係一款沙盒動作遊戲,採用第三身視點,開放世界,最大支援四人連線同遊。遊戲故事設定喺未來大家都唔再生仔,而剩低嘅人都淨係掛住打機無人工作,所以就無人俾到養老金,政府亦都無補貼,護老院自然會踢晒班廢老出街。為咗生存,廢老們唯一嘅選擇就係參加危險嘅真人 Show,收集退休券為咗得到免費入住護老院資格而廝殺。

 

 

身為廢老,骨頭脆到有如薯片一樣,遊戲中經常出現斷腳斷手斷頸情況,任何攻擊都能夠輕易整傷你,而且你亦可以自行整斷自己身體任意部位。遊戲舞台到處都係秘密隱藏小路,探索部份已經好唔錯,地圖上又有超大量嘅道具供拾取,例如巨型鹹魚、彈床、電線、煙花、斧頭、噴氣背包等等,加上莫名奇妙嘅合成系統,例如將煙花裝落單車度、喺手臂裝上翅膀飛黎飛去等等,完全反物理非常過癮!

 

 

《Just Die Already》已經推出,可單人遊玩或最大四人同遊,可合作完成任務或製造混亂然後肢解你嘅朋友。對應平台為 PS4、Xbox One、Nintendo Switch、PC Steam & Epic Games Store。

五木

動漫電玩宅,極愛金田一系列,擅長動作及策略遊戲

追蹤

更多文章