【遊戲評測】狗狗相伴治癒露營 《搖曳露營△ VIRTUAL CAMP》山麓露營場篇以凜視角享受慢活

大熱露營動畫《搖曳露營△ VIRTUAL CAMP》第二章「山麓露營場」上個月已經推出,趁住呢排靜靜地就返兜同大家介紹返。今次我哋扮演「凜」去戶外露營,渡過悠閒嘅一日。想同「撫子」出遊,享受慢活就要試下啦。

 

搖曳露營△ VIRTUAL CAMP ~山麓露營場篇~_20210418192245

 

《搖曳露營△ VIRTUAL CAMP》係一款悠閒露營體驗遊戲,今次介紹嘅係第二章「山麓露營場」,「本栖湖」就係第一章。除咗露營場地不同,操作角色亦由「撫子」變為「凜」。遊戲基本流程同第一章大致相同,都係要喺野外渡過一日,每段時間都有不同嘅互動選項,大多數都係望下四處嘅風景、飲野、傾計、影相、生火煮食等等,而喺本篇就有狗狗同你互動,睇住「撫子」同狗狗跑黎跑去都幾有動畫嘅感覺。

 

望住撫子同狗狗玩非常治癒

仲有得摸摸

沖野飲當然唔少得

 

同樣由於 VR 機能所限,所有互動都係用選項完成,無得親身去執柴、沖野飲、摸狗狗,而且最重要嘅煮食部份只係旁白+幾幅圖,不過今篇煮食部份有加入動畫版「食材變化」呢部份,感覺上比起前章更完整。

 

本章有動畫常見嘅「食材變化」,即係一道菜經過特別嘅烹調方式變出新口味

 

同前章相比,今章喺露營場有更多其他露營人士,場景上有更多帳蓬,相比之下今章身邊有「人」嘅感覺更強烈,可惜嘅係整體互動選項比前章少,如果有更多嘅事件或者突發事件(例如用晒 Gas 之類)就更有動畫味道了。當然,呢隻遊戲主要嘅作用係「舒壓」,聽下樹嘅聲音,望住遼闊嘅天空感受慢活,喺繁忙嘅日子下開住 VR 抖下其實都幾舒服。

 

 

《搖曳露營△ VIRTUAL CAMP》「山麓露營場篇」已經推出。遊戲對應平台為 PS4 / Nintendo Switch / PC Steam / iOS/Android/itch/Oculus Quest,對應 VR 為 NS Toy-Con 、PS VR、Steam HTC Vive、Oculus Rift 及 Valve Index。手機版本則支援市面上各種手機用 VR 眼鏡,另外不論任何版本唔用 VR 亦可以正常遊玩,不過我地都係推薦大家用 VR 玩,投入感絕對唔係同一個水平。

森麻

VJGamer總編,細細個已經蒲機舖,機齡甚深,熱愛電玩文化。

追蹤

Facebook 更多文章