【遊戲速評】可全自動戰鬥+數值超誇張《魔界戰記 6》畫質與順暢度只能擇其一

 

鍾意玩戰棋遊戲嘅朋友,相信你一定唔會對《魔界戰記》呢個系列感到陌生。《魔界戰記》可以話係日本一遊戲工作室嘅看門 IP,以戰術、多變職業、有趣劇本等等元素,令系列成為唔少 Fans 喜愛嘅作品。不過,於 2021 年 5 月 27 日推出繁體中文版本嘅《魔界戰記 6》嘅遊玩體驗就似乎有少少微妙,以下為編輯部嘅試玩速評。

 

 

《魔界戰記 6》是次對應平台為 PS4 及 NS,編輯部評測用嘅係 NS 版本,理由係我比較鍾意用手提機隨身玩戰棋遊戲。不過,相信現代玩家乜都講求速度,是以今次遊戲裡面,加入咗「全自動戰鬥」呢個選項,而呢個「全自動戰鬥」嘅 AI 亦都做得好聰明,假如玩家無特別買裝備、配道具,只係一味衝主線升 Level 嘅話,「全自動戰鬥」嘅 AI 幾乎都可以幫你「無痛轆過每一關」。

 

 

但係,《魔界戰記》係一隻考驗玩家戰術嘅遊戲,加入「全自動戰鬥」 呢個選項,似乎有少少自打嘴巴了。如果你係「淨係想睇劇本,唔想玩戰鬥」嘅玩家,或者呢個功能會非常適合你;但係對於一直以後都係手動戰鬥嘅玩家黎講,戰棋遊戲最好玩嘅部份,你居然可以 Set 自動,到底工作室係點樣看待自己作品嘅遊戲樂趣呢?

當然,你可能會話「咁你唔好開呢個功能咪得」,無錯,「咁你唔好開」嘅功能,除左「全自動戰鬥」 ,仲有可以稱為「內置外掛」嘅設定:遊戲中有一個角落,容許玩家調整戰鬥中獲得嘅經驗值、金錢獲得值等等要唔要有 Extra 嘅加乘。

 

 

例如玩家可以減少武器|職業嘅慣用度,將減少嘅比率,加落去角色經驗值上面。只要你有手動個呢啲設定,進行戰鬥時嘅經驗加乘,幾乎係幾何倍數級嘅增長。呢個設定對於想要心急衝關|爆機嘅玩家黎講,可能係好吸引嘅;但係一旦開啟咗呢種「內置外掛」功能,其實亦會大大影響遊戲難度嘅平衡,所以真係視乎玩家自己點睇。

今次《魔界戰記 6》裡面顯示嘅數值亦都係極為誇張,頭一關新手教學,玩家角色已經可以單擊對敵人做成逾五千點傷害;到後期練得再勁咗,真係「999999999999」點傷害無難度。呢種「印尼盾」級浮誇數字可能會喺視覺上帶比玩家衝擊,但係實際用途則好微妙。

除咗系統上面呢啲設定耐人尋味,遊戲本身嘅畫質同埋效能都係令人疑惑。《魔界戰記 6》係系列作首次以 3D 戰棋形式進行戰鬥,但係戰鬥裡面嘅視點就唔算好友善;同埋呢隻以 PS4 以及 NS 作為主要販售平台嘅非 3A 作品,畫面效能呈現方面做得相當麻麻。

 

 

如果玩家選擇「畫質優先」,咁角色嘅動作就會勁 Lag 勁窒到 30fps 都好似無;如果玩家選擇「效能優先」,角色動作順暢度增加,但係就換黎疑似 PS3 程度嘅畫面。我相信大部份玩家同我一樣,都只能折衷揀選「平衡」嘅呈現模式,即係畫面朦朦地,行路窒窒地,先叫做無咁違和。呢一點係令人失望嘅,唔講 NS,PS4 都已經係接近十年前嘅機種,何以一隻於 2021 年推出嘅全新作品都仲會係呢種畫面效能呢?

 

 

我唔算係一個《魔界戰記》死忠 Fans,但係以往作品都有認真攻略過,所以今次呢隻《魔界戰記 6》各方面嘅表現,都不時令我摸不著頭腦。希望呢篇「遊玩速評」唔會令忠粉們太反感,亦希望廠商見到唔好太嬲(戴頭盔)不過,作為日本一工作室看家 IP 之一,《魔界戰記 6》整體黎講都叫人期待不似預期,可能真係要忠粉「憑著愛」先能夠完成全隻遊戲了。

 

 

神婆

為咗兩隻貓嘅生活努力奮鬥,日系遊戲及 RPG 專攻,重度聲優控。

追蹤

Facebook 更多文章