《大航海時代 4 威力加強版HD》早排出咗，不過你行出面啲舖頭應該都唔會見到，因為連普通版都比人買斷晒，限定版就更加少有。我哋有幸得到光榮送出一套《大航海時代 4 威力加強版HD》限定版，重點「原聲 CD」合集拎上手都好有份量，Fans 真係必儲！

未開封前包裝外觀

有儲開限定版嘅朋友通常都有個執著，就係要訂日版。一般黎講行版同日版嘅分別大多數都係封面封底說明文字語言，同埋面頭分級標誌。今次《大航海時代 4 威力加強版HD》嘅限定版將分級標同埋封底產品說明印喺包裝膠膜外面，只要撕走膠膜就同日版一模一樣，非常抵讚。

將分級標同埋封底產品說明印喺包裝膠膜外面

唯一可惜係遊戲本體跟返行版包裝（但係遊戲卡帶編號係日版的…….）

拎起遊戲本體就會見到重點 – 原聲 CD 合集

外盒設計閃閃下好靚仔

背面

拎出黎有 5 盒總數 10 隻 CD

CD 背面

好多人覺得想聽歌買數位限定版就得，其實就未必。首先以收藏、觀賞性黎講有套實體碟已經贏晒，再者 Steam 嘅數位版入面跟嘅音樂檔都係 MP3，而唔係 FLAC 或者 Wave 檔，音質上始終有分別，所以今次嘅實體限定絕對有佢嘅價值喺度。