【遊戲介紹】地下城探索動作遊戲 《Knight Crawlers》獨特布娃娃物理戰鬥系統

唔知大家有無玩過《Human Fall Flat》、《Gang Beasts》呢類物理引擎奇奇怪怪嘅遊戲,今次介紹嘅遊戲《Knight Crawlers》就有啲似果種奇怪物理感,再用呢種感覺打地下城,睇片將呢啲元素溝埋又幾得意,今年有得玩。

 

 

《Knight Crawlers》由獨立團隊 Chaja 開發,係一款 Roguelike 動作角色扮演遊戲。遊戲故事暫時不明,淨係知道玩嘅要深入無盡嘅地下城,迎接一波又一波嘅怪物,奮力對抗到底。遊戲特色在於獨特嘅物理戰鬥系統,喺預告片入面見到角色揮舞巨大嘅錘,跳起再打落地面,但係個動作就唔太似「揮動」,攻擊動作非常奇特。

 

 

遊戲中所有角色都係以布娃娃形式表現,雖然角色感覺「軟棉棉」,但仍然可以感受到武器嘅重量。現時已知武器有錘子、長柄連枷,仲有魔法同弓戰等遠程攻擊手段。另外擊敗敵人後會得到可製作武器防具嘅戰利品,亦會得到附加移動速度、攻擊速度、召喚同伴角色、熔岩雨等能力,製作啱自己戰鬥風嘅武器同技能將會左右喺地下城探索嘅時間。

當每次完成地城探索,會得到天賦技能點,喺天賦樹入面嘅選擇將會決定角色會擁有咩技能及成長方向。另外遊戲設有 PvP 競技場戰鬥模式。

 

 

《Knight Crawlers》預計於今年 11 月上市,對應平台為 PC Steam。

五木

動漫電玩宅,極愛金田一系列,擅長動作及策略遊戲

追蹤

更多文章