今年 E3 遊戲展正式開波，由於武肺關係展覽以線上型式舉辦，打頭陣嘅有 Ubisoft Forward 發表會。會上新作可謂大連發，除咗每年都有嘅《JUST DANCE 舞力全開 2022》，仲有期待已久嘅《虹彩六號：撤離禁區》（Rainbow Six : Extraction）、《極地戰嚎 6》（Far Cry 6）等作品，最令人驚喜嘅仲有《瑪利歐 ＋ 瘋狂兔子 希望之星》（Mario + Rabbids Sparks of Hope）同埋壓軸嘅《Avatar: Frontiers of Pandora》令人喜出望外。

每年都會推出嘅《Just Dance 舞力全開》今年繼續有，新一集照舊加有新歌，當中包括 Todrick Hall 「Nails, Hair, Hips, Heels」、Imagine Dragons 「Believer」、Ciara 「Level Up」等，2021 年 11 月 4 日於 Nintendo Switch、PS4、PS5、Xbox One 及 Xbox Series X | S 發售。

玩 PvE 嘅《虹彩六號：撤離禁區》講述「REACT」幹員組成嘅 1 至 3 人小隊（由《虹彩六號：圍攻行動》幹員組成），對抗「古菌體（Archæans）」神秘外星生物。完成每個目標後，玩家必須做出抉擇：撤離並領取獎勵，或繼續深入面對更強敵人和獲得更好獎勵。輸的話就會暫時失去幹員，要營救失蹤幹員，就要組隊冒險展開救援任務。將於 2021 年 9 月 16 日推出，對應平台為 Xbox Series X|S / Xbox One / PS5 / PS4 / PC。

全新大型多人戶外運動遊戲《極限共和國》（Riders Republic），玩家可與好友在廣大開放世界中自由漫遊，透過一系列刺激運動，如自行車、雙板滑雪、單板滑雪、飛鼠裝和火箭飛鼠裝，相互競爭與表演瘋狂的特技動作。遊戲包含多種模式，可供玩家與好友組隊或對戰。現時只要登錄就有機會參加即將登場 Beta 測試，詳情請到呢度 。

遊戲將於 2021 年 9 月 2 日推出，對應平台為 Xbox Series X|S / Xbox One / PS5 / PS4 / PC。

同任天堂合作嘅《瑪利歐 ＋ 賤兔 王國之戰》（Mario + Rabbids Kingdom Battle）新一集，《瑪利歐 ＋ 瘋狂兔子 希望之星》（Mario + Rabbids Sparks of Hope）。遊戲延續上集策略角色扮演玩法，透過融合回合制戰術及即時行動嘅創新戰鬥系統智取敵人。今集舞台將會變為整個銀河系，玩家可以找到及拯救眾多擁有獨特力量與個性嘅 Spark，同佢哋一齊展開旅程。

將於 2022 年推出，對應平台為 Nintendo Switch。

《極地戰嚎 6》（Far Cry 6）係一款角色扮演射擊遊戲，採用第一身視點，開放世界。今集以迦勒比海熱帶天堂「亞拉」為舞台，玩家將加入革命行動，將亞拉人民從獨裁者安東・卡斯迪路（Giancarlo Esposito 飾，《曼達洛人》、《絕命毒師》）和他兒子迪亞哥（Anthony Gonzalez 飾，《可可夜總會》）專制統治下解救出來，體驗游擊戰的驚險與混亂。

新影片除咗令玩家感受遊戲反派獨裁者安東・卡斯迪路嘅殘酷，仲公開未來 DLC 季票（Season Pass）計畫，讓玩家可以扮演三、四、五代反派角色。遊戲預計於 10 月 7 日推出，對應平台為 Xbox Series X|S / Xbox One / PS5 / PS4 / PC。

最後壓軸公布嘅新遊戲《Avatar: Frontiers of Pandora》，改編自電影《阿凡達》，採用 Ubisoft 最新版本 Snowdrop 引擎開發，係一款第一身視點動作冒險遊戲。今次全新嘅獨立外傳中，玩家將扮演納美人踏上旅程，橫跨潘朵拉無人見過的地區——「西部邊境」。探索有著獨特生物與新角色的生意盎然世界，並擊退威脅這個世界的強大 RDA 部隊。

遊戲將於 2022 年推出，對應平台為 Xbox Series X|S 、PS5 及 PC。